Pavlodarda qystyń alǵashqy kúni 1 jeltoqsannan bastap qoǵamdyq kólikterdegi jolaqysy 80 teńge bolady, dep habarlaıdy pavlodarnews.kz.
Bul týraly qalalyq máslıhat depýtattarynyń sessııasynda belgili boldy. Turǵyn úı kommýnaldyq sharýashylyq bóliminiń sektor meńgerýshisi Marat Asylbekovtyń aıtýynsha, elimizde orta eseppen jol aqysy 79 teńgeni quraıdy.
«Elimizdegi 15 qalanyń beseýinde jolaýshylarǵa jeńildikter qarastyrylǵan. Solardyń ishinde eń kóp 15 toptyń ókilderine jeńildikter jasaǵan Pavlodar ǵana. Búgingi tańda janarmaı men kólik saımandarynyń qymbattaýy tasymaldaýshylarǵa yńǵaısyzdyq týdyryp, shyǵyn keltirip otyr. Osyǵan baılanysty biz jolaqysyn 70 teńgeden 80 teńgege kóterý jóninde usynys bildirdik. Daýysqa salǵan 20 depýtat jolaqysyn kóterýge birjaqty kelisim berdi. Alaıda tasymaldaýshylarǵa kelesideı talaptar qoıyldy: 15 top ókilderine 50 paıyzdyq jeńildikterdi saqtaý, jolaýshylardyń yńǵaılylyǵy úshin qoǵamdyq kólikterdiń júrý ıntervalyn retke keltirý jáne jolaýshylardyń qaýipsizdigin qamtamasyz etý», - deıdi Marat Asylbekov.