El bolashaǵy marǵasqa Maǵjan aqyn senim artqan táýelsiz eldiń erkin oıly jastarynyń qolynda. «Talaptyń oty aryndap» turǵan shaǵynda aldyna baǵyt-baǵdar qoıyp úlken armannyń bıigine maqsatkerlikpen umtylatyn ul-qyzdar ultymyzdyń erteńi.
«Egemen Qazaqstan» gazetiniń Almatydaǵy bólimin eshkimniń nusqaýynsyz ózderi izdep kelgen bir top mektep oqýshylaryn kórgende qazaq baspasóziniń jarqyn bolashaǵyn kórgendeı kóńilimiz kókjıekke kóterildi. Jón suraı kele, jaqynda ǵana alpys jyldyǵy toılanǵan Almatydaǵy Abaı atyndaǵy qazaq tili men ádebıetin tereńdetip oqytatyn №2 mektep ınternatynyń shákirtteri ekenin bildik. Aralarynda Baǵlan esimdi tárbıeshileri bar. Bolashaqta qazaq jýrnalıstıkasynyń qazanynda qaınasaq degen armannyń jetegine ergen jetkinshekter ǵasyrlyq tarıhy bar aǵa basylymnyń aıtýly tilshilerimen kezdesip áńgime-dúken qursaq degen nıetpen kelipti. Basylymnyń Almatydaǵy bóliminiń meńgerýshisi Nurǵalı Oraz ben gazettiń sholýshysy belgili qalamger Jumabaı Shashtaıuly arnaıy izdep kelgen shákirtterdiń kóńilin jyqpaı qazaq baspasóziniń arǵy bergi tarıhynan syr shertip áserli áńgime órbitti.
Kezdesý barysynda oqýshylar aǵalaryna oılaryndaǵy suraqtaryn qoıyp, óz armandarymen bólisti. Sóz arasynda el gazetin basqarǵan ýaqytynda basylymǵa jańasha súrleý salǵan halyq jazýshysy Sherhan Murtazanyń ómiri men shyǵarmashylyǵy, qazaq rýhanııatyna sińirgen qajyrly eńbegi jaıly oramdy oılar aıtyldy.
– Munda kelgen negizgi maqsatymyz gazet ómirimen jaqynyraq tanysý. Bolashaqta jýrnalıst bolýdy armandaıtyn bir top oqýshylar osynda kelip «Egemen Qazaqstan» ujymymen tanysyp shyǵarmashylyq baılanys jasasaq degen nıet bildirgen edi. Aǵalarymyzdyń taǵylymdy áńgimesi jastarǵa úlken shabyt pen jiger syılady. Aldaǵy ýaqytta gazet ardagerlerimen mektebimizde úlken rýhanı kezdesý ótkizsek degen josparymyz bar. Basylymdy basqaryp otyrǵan Darhan Qydyráli, Aıbyn Shaǵalaqov sııaqty aǵalarymyz, sondaı-aq belgili jýrnalıst Aınash Esalı apaıymyzdyń bizdiń mektepten túlep ushqan shákirtter ekenin árqashan maqtan tutamyz – deıdi mektep muǵalimi Baǵlan Salqymov.
Arman OKTIаBR, «Egemen Qazaqstan»
ALMATY