Aqtaýda Mańǵystaý oblysynyń lańkestikke qarsy komıssııasynyń otyrysy ótti. Jıynda oblystyq buqaralyq aqparat quraldarynyń óńir halqymen destrýktıvti dinı aǵymdardyń ıdeologııasyna qarsy sharalar, memlekettiń terrorızm kúres saıasaty týraly halyqty aqparattandyrýy talqylandy.
Jyl basynan beri buqaralyq aqparat quraldarynda dinı ekstremızmniń aldyn alý jáne turǵyndardyń dinı saýattylyǵyn arttyrýǵa arnalǵan barlyǵy 400-ge jýyq materıal jaryq kórdi. Onyń ishinde, baspa basylymdarynda – 150-ge jýyq maqala, teledıdar efırinde – 100-ge jýyq sıýjet, ǵalamtor saıttarynda – 150-ge jýyq materıal jarııalanǵan.
«Qazaqstan-Aqtaý» telearnasynda esepti kezeń ishinde «Adasqandar» spektakliniń jazbasy, «Adasqan aǵymdar», «Osýjdennye», «Zablýjdenıe», «Jıhad degen ne?», «Sırııskıı kapkan», «Chto nasha jızn», «Pokaıanıe», «Chas H», «Ata joly», «Spesreportaj», «Krýgovert (Takfır)», «Radıkalızm matrısasy» jáne basqa da beınefılmder kórsetildi. Sapaly jáne rastalǵan aqparatty jetkizý maqsatynda óńirlik deńgeıde tilshiler pýly qurylǵan, dástúrli jáne dástúrli emes dinder boıynsha saýattylyǵyn arttyrý maqsatynda semınar-trenıngterge qatystyrylyp otyrady,-dedi ishki saıasat basqarmasynyń mindetin atqarýshy Qurmanbek Jumaǵalı.
Lańkestikpen kúresý maqsatynda Densaýlyq saqtaý basqarmasy 7 toptan turatyn óńirlik jedel shtabty medısınalyq-psıhologııalyq qoldaý tobyn qurdy. Aımaqtyń 12 medısınalyq mekemesinde 15 mıllıonnan astam teńgege beınebaqylaý júıesi ornatylǵan.
Tótenshe jaǵdaılar departamentiniń bastyǵy Qýanar Bazarbaevtyń málimetinshe, oblysta shuǵyl qutqarý jáne jedel jumys kúshterinde 120 adam bar jáne 24 birlik tehnıkamen jaraqtanǵan. Basqarmada avarııalyq-qutqarý qyzmetterimen 11 tikeleı telefon jelisi qosylǵan. Halyqty jedel habardar etý úshin SMS-habarlama arqyly eskertý júıesi qoldanylady. Azamattardy qorǵaý jáne tótenshe jaǵdaı saldaryn qalpyna keltirý maqsatynda shuǵyl áreket etý toptary quryldy.
Lańkestikke qarsy komıssııasynyń otyrysynda tómendegi sheshimder qabyldandy. Atap aıtsaq, jergilikti telearnada, halyq kóp shoǵyrlanǵan alańdarda, qalalar men aýdandarda LED – ekranda úzdiksiz turǵyndardyń dinı saýattylyǵyn arttyrýǵa arnalǵan beınebaıandar taratý; Jergilikti BAQ-ta antıterrorlyq sıpattaǵy maqalalardy aı saıyn jarııalaý; Din ister basqarmasynyń tapsyrysyna saı, jat aǵymdarǵa jáne jalǵan dinı uıymdarǵa qarsy tura alatyn bilikti teologtarmen qamtamasyz etý; Halyqqa terrorızm aktileriniń aldyn alýǵa kómek kórsetetin beınebaıandar jarııalaý;
Shetelde dinı bilim alýdyń qaýpi týraly jastar arasynda túsindirý jumystaryn kúsheıtý; «STOP SECT Aktau» ınternet-qoǵamdastyǵynda halyqtyń dinı saýattylyǵyn arttyrý, ulttyq salt-dástúrlerdi nasıhattaýǵa jáne jastardyń rýhanı áleýetin damytýǵa baǵyttalǵan materıaldardy ornalastyrý; Meshitterde, saýda oryndarynda, áleýmettik mekemelerde dinı ádebıetterdiń zańsyz taratýdy anyqtaý jáne aldyn alý; Barlyq oblystaǵy dinı ǵımarattardy beınebaqylaý júıesimen qamtamasyz etý.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy