Fleshmob túrinde ótken patrıottyq aksııa jastardy sybaılas jemqorlyqqa qarsy bolýǵa, qoǵamdy keselden tazartýǵa shaqyrýdy maqsat etti.
Ony Memlekettik qyzmet jáne sybaılas jemqorlyqqa qarsy is-qımyl departamenti men Jastar isi jónindegi oblystyq basqarma uıymdastyrdy. Oǵan oblys ortalyǵyndaǵy joǵary oqý oryndarynyń, kolledjder stýdentteri qatysty. A.Baıtursynov atyndaǵy ýnıversıtet aldyndaǵy alańda jastar «100 naqty qadam» baǵdarlamasyn júzege asyrýdy meńzep, 100 sanyn jasap qatarǵa turdy. 100 sanyn aıshyqtaý úshin stýdentterdi QR IIM akademııasynyń forma kıgen kýrsanttary qolyna shar ustap, qorshap turdy. Osy sátti túsirý úshin kvadrakopter ushyrylǵanda onymen birge jastar 100 shardy da aspanǵa jiberdi.
«Biz sybaılas jemqorlyqty, korrýpsııalyq quqyq buzýshylyqty barynsha azaıtýdy maqsat etip, oǵan kóptiń, onyń ishinde jastardyń kóńilin aýdarý úshin osyndaı sharalardy ótkizip otyrmyz. Biz bul aksııa sybaılas jemqorlyq qubylysyn azaıtady nemese túbirinen joıyp jiberedi demeımiz, bizdiń ótkizip júrgen bul sharalarymyz memlekettik apparattyń bedelin, jaǵymdy atyn kórsetedi» dedi Memlekettik qyzmet jáne sybaılas jemqorlyqqa qarsy is-qımyl departamenti bastyǵynyń orynbasary Erlan Salyqbaev.
Departament qyzmetkerleri mundaı aksııaǵa stýdenttermen qatar mektep oqýshylaryn tartyp otyr. О́ıtkeni sybaılas jemqorlyqqa tózbeýge, ol ardyń isi ekenine jas kezden tárbıeleý kerek dep biledi.
Názıra Járimbet
«Egemen Qazaqstan»
Qostanaı