Kásipqoı boks tarıhyndaǵy eń tanymal bapkerlerdiń biri sanalatyn amerıkalyq Freddı Roých shymkenttik boksshy Meıirjan Pirtaevty jattyqtyrmaq nıette. AQSh-qa jýyrda ǵana qonys aýdarǵan qazaq balasy Roýchpen kelisimge kelse, keler jyldyń kókteminde kásiqoı bokstaǵy alǵashqy jekpe-jegin ótkizetinin aıtty.
Freddı Roýchty bokssúıer qaýym óte jaqsy tanıdy. Ony kópshilikke tanystyryp jatýdyń ózi artyq. Degenmen, ataqty bapker kimderdi jattyqtyrǵanyna bir kóz júgirtip kórsek. Tizim áıgili Maık Taısonnan bastalady. Bul tizimde sondaı-aq, túrli salmaqtardaǵy álem chempıondary: Mennı Pakıao, Mıgel Kotto, Vladımır Klıchko, Bernard Hopkıns, Amır Han, Gılermo Rıgondo, Djeıms Tonı, Denıel Djeıkobs, Jan Paskal, Oskar De La Hoııa, kishi Hýlıo Sezar Chavester bar.
Ol sondaı-aq, 7 ret «Jyl bapkeri» degen ataqqa ıe bolǵan.
Meıirjan Pirtaev jastar arasynda Qazaqstan chempıony jáne respýblıkalyq spartakıadanyń jeńimpazy. Ol eresekter arasynda da kóptegen halyqaralyq týrnırlerdiń jeńip alǵan. Ulttyq quramanyń sapynda iri jarystarda el namysyn abyroımen qorǵady.
Meıirjannyń aıtýynsha, ony kásipqoı boksqa osymen ekinshi ret shaqyrypty. Ekeýinde de Amerıka Qurama shtattaryna. Ekinshi shaqyrtýdan bas tarta almadym deıdi ol.
«Eń alǵash ret qazaqstandyq kásipqoı boksshy Nurhan Súleıman aǵamyzdyń kózine tústim. AQSh-ta kásipqoı bokspen shuǵyldanǵan Nurhan aǵamyz Shymkentte ótken jarystardyń birine qonaq bolyp kelip, meniń jekpe-jegimdi tamashalaǵan bolatyn. Ol kezde jastar arasynda júrgen kezim. «Kásipqoı boksqa aýysýyń kerek, menimen Amerıkaǵa júr, juldyz bolasyń» dedi. Tym jas bolǵandyqtan ózdigimmen sheshim qabyldaı almadym, ata-anammen aqyldastym. Ol kisiler alys elge jibergisi kelgen joq, sodan qalyp qoıdym», - deıdi M.Pirtaev.
Talantty boksshy áıgili Freddı Roýchtyń kózine qalaı túskenin de aıtyp berdi.
«Shynyn aıtý kerek, jasym otyzǵa jaqyndap qaldy, Ulttyq quramaǵa ilingenimmen Álem chempıonattaryna, Olımpıadaǵa bara almadym. Kezinde kásipqoı boksqa ketpegenim úshin de ókinip júrgenmin. Osy sátte AQSh-ta kásipqoı bokspen aınalysyp júrgen dostarym habarlasyp, jedel kelýimdi surady. Oılanyp-tolǵanǵan joqpyn, sómkemdi jınap ketip qaldym. Jattyǵý zalyna alyp bardy, birneshe bapkerge kórsetti, sparrıng ótkizdik. Sol sátte jekpe-jekterimdi Freddı Roých ta syrttaı tamashalaǵan eken. Dereý shaqyrtyp alyp, jónimdi surady. Jaqynyraq tanysqannan keıin kelisimshartyn usyndy. Qazir osy kelisimshartty talqylap jatyrmyz», - dedi ol.
Aıta keteıik, Freddı Roých buǵan deıin birde-bir qazaq boksshysymen jumys istespegen.
S.Abaıuly