Astana qalasynda «Altyn urpaqtyń rýhy» atty kórkemsóz oqıtyndardyń respýblıkalyq baıqaýy ótken bolatyn. Mine, osy aıtýly poezııa merekesinde Shýchınsk qalasyndaǵy pedagogıkalyq kolledj stýdenti Jansaıa Bekbolatova birinshi oryndy ıemdendi.
Árıne, sonshama kórermenniń aldyna shyǵyp, sahnadan óleń oqý ońaı tımegeni anyq. Bul joly Jansaıa aqıyq aqyn Muqaǵalı Maqataevtyń «Soqyr ana» monologin tańdapty. Negizinen shara jazýshy Ǵabıden Mustafınniń týǵan kúnine oraılastyrylyp ótkizildi. Mundaǵy basty maqsat – jazýshynyń shyǵarmalaryn barynsha nasıhattaý. Sonymen qatar shetel jáne otandyq ádebıetshilerdiń shyǵarmalaryn barynsha tanymal etý.
Álemdik mádenıet qundylyqtaryna qurylǵan poezııa keshi de sátimen ótip, kórermen kóńilin jadyrata tústi. Atalǵan jarysqa elimizdiń ár óńirinen orta jáne joǵary oqý oryndarynyń 135 stýdenti qatysqandyǵyn eskersek, atalǵan sharanyń qanshalyqty tartysty ótkendigine kóz jetkizýge bolady. Sondaı-aq úshinshi orynǵa ıe bolǵan Erkegúl Jakenova da Shýchınsk qalasyndaǵy pedagogıkalyq kolledj stýdenti bolyp tabylady. Ol Muhtar Shahanovtyń «Otyrar» poemasynan úzindi oqyp, tyńdarmandaryn tánti etti. Atalǵan oqý ornynyń qazaq tili men ádebıeti pániniń muǵalimi Aqylbaı Temirov aǵynan jarylyp bylaı dedi: «Osyndaı shara ótkizý óz Otanyna degen qurmet pen súıispenshilikti oıatady, árbir balanyń boıynda tulǵalyq sıpat qalyptasýyna, Qazaqstan jastarynyń shyǵarmashylyq áleýetin ashýǵa oń yqpal etedi. Sonymen birge otandyq tarıh pen ádebıetke qyzyǵýshylyǵyn arttyryp, kórkemsóz ónerine jáne qoıylym qoıýǵa baýlıdy». Shynynda da bul saıys jastardy jarystyryp ǵana emes, tabystyrǵan ádemi poezııa merekesine aınaldy.
Asqar TURAPBAIULY, «Egemen Qazaqstan»
Aqmola oblysy