Ordabasy aýdanynyń ortalyǵy Temirlandaǵy Qajymuqan mýzeıindegi qundy jádigerlerdiń árqaısysynyń ózindik tarıhy bar. Birqatar jádigerler mýzeıge bertinirekte tapsyrylǵan. Sondaı biregeı jádigerlerdiń biri – kúmisten jasalǵan laǵyl tasty áshekeılermen kómkerilgen beldik.
Aty álemge áıgili Qajymuqan 1945 jyly Semeıdegi uly Abaıdyń 100 jyldyq mereıtoıyna barǵanda osy beldikti bazarlyq retinde satyp alyp, jubaıy Minaıymge syılapty. Beldiktiń bir-birine japsarlastyrylyp birden jetige deıin nómirlengen áshekeıli bólikteri bar. Sondaı-aq kórnekiligi taza kúmisten bederlengen betterine qyzyl kózdi tastan áshekeıler japsyrylǵan. Qajymuqan mýzeıiniń ǵylymı qyzmetkeri G.Áshirbaevanyń aıtýynsha, kúsh atasy Qajymuqannyń jubaıy Minaıym ómirden óteriniń aldynda tósek tartyp jatqanda Sháýildirde turǵan Jańyl esimdi sińlisi kóńilin suraı kelgen. «Sonda Minaıym apa óziniń sińlisi Jańylǵa «beldikti maǵan palýan jezdeń syıǵa bergen edi, endi osyny sen al, jezdeńniń jáne meniń kózimdeı kórip júr» dep áshekeıli kúmis beldikti beredi. Qajymuqan palýannyń úshinshi áıeli Minaıym apamyz 1978 jyly dúnıeden ótken. Jańyl apamyz óz urpaqtaryna apaıy men jezdesinen qalǵan estelik belgi dep tarıhyn aıtyp otyratyn-dy. Ol kisi 1994 jyly qaıtys bolady. Jańyl apamyzdyń uly Saýynbaı Mamaserikov ony 2002 jyldyń naýryz aıynda mýzeı qoryna ótkizgen», deıdi mýzeı qyzmetkeri.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy