Beıjiń qalasynda ótken «Best humor artist award – 2017» halyqaralyq baıqaýynda «Egemen Qazaqstan» gazetiniń sýretshisi, karıkatýrashy Aıdarbek Ǵazızuly «2017 jyldyń úzdik sýretshisi» ataǵyn jeńip aldy.
Álemniń shartarapynan júzdegen sýretshi qatysqan baıqaýǵa ár qylqalam sheberi júz sýretin jibergen. Solardyń arasynan jıyrma jeti adam úzdik dep baǵalanǵan. Júldegerler arasynda Adrıan Palmas (Argentına), Alekseı Talımonov (Ulybrıtanııa), Askın Aıranchıoglý (Túrkııa), Kornel Chıorean (Rýmynııa), Darko Drjevıch (Chernogorııa), Emılıo Iska (Italııa), Eraı О́zbek (Túrkııa) Fırýz Kýtalmısh (Norvegııa), Kapýsta Nıkolaı (Ýkraına), Mahmýd Barhordar (Iran) sekildi qylqalam sheberleri bar. Bir qyzyǵy, Qytaıda ótken bul baıqaýda júldegerlerdiń arasynda birde-bir Qytaı azamaty joq. Mýltıplıkatorlar federasııasynyń halyqaralyq uıymy uıymdastyrǵan baıqaýda álemniń úzdik sýretshileri tórelik etken. Karıkatýra – qoǵamdaǵy keleńsiz qubylystarǵa synı-áleýmettik kózqarasty bildiretin óner. Sońǵy ýaqyttarda karıkatýra oryndalý jaǵynan da birshama damyp, óz ókilderine de joǵary talap qoıa bastaǵan. Iran, Túrkııa, Qytaı, Italııa, Polsha, Belgııa, Ázerbaıjan, Horvatııa sııaqty memleketterde óte jaqsy damyǵan bul ónerdiń túrinen jylyna birneshe úlken konkýrstar uıymdastyrylady. Myń jarym adamǵa deıin qatysatyn bul saıystarda úzdik júzdikke kirýdiń ózi úlken jetistik. Aıdarbek Ǵazızuly qazaq karıkatýrashylarynyń ishinde álemdik saıystardan júldeger bolyp júrgen sanaýly óner ıeleriniń biri.
Aıdarbek Ǵazızulynyń kezekti jeńisimen quttyqtap, mol shyǵarmashylyq tabys tileımiz!
Baǵashar TURSYNBAIULY, «Egemen Qazaqstan»