Inder aýdanynda oqýshylar arasynda shańǵydan jarys ótti. Jarysqa aýdandaǵy barlyq mektepterden 145 jas sportshy qatysty, dep habarlaıdy Atyraý oblystyq О́ńirlik kommýnıkasııalar qyzmeti.
Shara uıymdastyrýshylary - Inder aýdandyq ákimdigi. Jarystyń maqsaty - Ońtústik Koreıadaǵy qysqy olımpıada oıyndaryna qatysyp jatqan qazaqstandyq olımpıadashylarǵa qoldaý bildirý. Inder aýdanynyń ákimi Serik Arystannyń aıtýynsha, balalardyń umtylysy jaqsy, sondyqtan jergilikti oqýshylar aımaqaralyq jarystarda ylǵı júldeli orynǵa ıe.
«О́tken jyly barlyq mektepterge shańǵy men konkı alyndy. Basty maqsat – aýdanda qysqy sport túrlerin damytý. Búgingi kúnge deıin balalardyń jattyǵýyna múmkindik bolmady. Endi barlyq mektepte óz komandalary bar. Búgin aýdan tarıhynda alǵash ret qazaqstandyq olımpıadashylardy qoldaý maqsatynda saıys ótkizdik», deıdi Serik Arystan.
Taza aýadaǵy qyzyqty saıys eshkimdi beı-jaı qaldyrmady.
«Osyndaı jarystar jıi ótip turǵanyn qalaımyn. Biz kórshi oblystarda ótken osyndaı jarystarǵa qatysyp, ekinshi oryn aldyq. Endi ylǵı jattyǵyp, kelesi jarystarda mindetti túrde júldeli oryn alamyz», dedi qatysýshylardyń biri Sultanbek Rahmetov.
Aıta keteıik, óńirde jazǵy sport túrleri dástúrli túrde qarqyndy damyp keledi. О́tken jyldan bastap munda qysqy sport túrlerin damytýdy da qolǵa alǵan. Tek Inder aýdanynda ǵana 49 mıllıon teńgege barlyq mektepterge qajetti quraldar alyndy.