Astana qalasyndaǵy K.Baıseıitova atyndaǵy opera jáne balet teatrynda Qazaqstan halqy Assambleıasy «Qazaqstannyń Damý banki» AQ qoldaýymen «Samuryq» Ulttar teatry belgili qazaq jazýshysy, dramatýrg Dýlat Isabekovtiń pesasy negizinde sahnalanǵan «Baqyt qusy» spektaklin kórermen nazaryna usyndy. Spektakldiń rejısseri Nurqanat Jaqypbaev. Qoıylymǵa Áýezov atyndaǵy, Lermontov atyndaǵy, N.Sas atyndaǵy óner ordalarynyń, sondaı-aq uıǵyr, koreı teatrlarynyń tanymal ártisteri, T.Júrgenov atyndaǵy Ulttyq óner akademııasynyń stýdentteri qatysty.
«Baqyt qusy» bul qazirgi zamannyń ózekti máselelerin tereń fılosofııalyq turǵydan qarastyratyn lırıkalyq drama. Týǵan jerin súıip, baǵalaı biletin, bir-birinen kómegin aıamaıtyn aýyldastardyń ómirin sýretteıdi. Qoıylymda tilderi bólek túrli ult ókilderi ózara mahabbat pen kelisim tilinde túsinisedi. Onda kórermendi eriksiz kúlkige tartatyn oqıǵalar da barshylyq.
Rýhanı dástúrlerdi damytyp, adamdarǵa izgilik syılaýdy aldyna maqsat etip alǵan «Samuryq» Ulttar teatrynyń kórkemdik jetekshisi T.Júrgenov atyndaǵy Ulttyq óner akademııasynyń rektory Arystanbek Muhamedıuly ekenin de aıta ketken jón.
Qanat ESKENDIR,
Astana.