Júzý sportynan Olımpıada chempıony Dmıtrıı Balandın Ispanııanyń Malaga qalasynda ótip jatqan halyqaralyq týrnırde ekinshi altynyn jeńip aldy. Bul týraly vesti.kz habarlady.
Qazaqstandyq sportshy keshe 200 metrge brass ádisimen júzýde úzdik shyǵyp, rekord jańartqan edi. Búgin 50 metrge brass ádisimen júzýde jeńimpaz atandy. Atalǵan qashyqtyqty Dmıtrıı 0:27.80 sekýndta júzip ótti. Al Aıbek Qamzenov 0:28.56 sekýnd kórsetkishimen úshinshi oryn aldy.
100 metrge erkin ádispen júzýde Ádil Qasqabaı kúmis júldege qol jetkizdi. Sondaı-aq keshe Ádilbek Mýsın 50 metrge batterflıaı ádisimen júzýde kúmis júldeger atanǵan bolatyn.
Malagadaǵy jarys 11 sáýirde aıaqtalady.