Astanada kásipkerliktiń damý qarqyny jyl ótken saıyn artyp keledi. О́ńirlik bıznesti damytýdaǵy basym baǵyttar «Atameken» ulttyq kásipkerler palatasynyń tóralqa tóraǵasy Tımýr Qulybaev pen qala ákimi Áset Isekeshev qatysqan elorda kásipkerleriniń dástúrli konferensııasynda keńinen talqylandy.
Osy jıynda aıtylǵandaı, elorda ekonomıkasyndaǵy shaǵyn jáne orta bıznestiń úlesi 57,4 paıyzdy qurap, ótken jylmen salystyrǵanda 12 paıyzǵa artqan. Bul baǵytta ınvestısııa kólemi de 10 paıyzǵa ulǵaıyp, 944 mlrd teńgege jetti. Jalpy, qalada 100,8 myń kásipkerlik sýbektileri tirkelgen, onda 325,2 myń adam jumys isteıdi. Eskeretini kásipkerlerdiń basym bóligi saýda salasy, servıstik qyzmet kórsetýmen aınalysady.
Astana qalasy kásipkerler palatasynyń dırektory Ǵanı Tasmaǵanbetov óndiris oshaqtarynyń sanyn arttyrý maqsatynda keler jyldan bastap bas qalada biregeı joba iske qosylatyndyǵyn málimdedi. Onyń aıtýynsha, 2020 jyly kólemi 440 gektar jerdi qamtıtyn ekinshi ındýstrııalyq aımaqty qurý josparlanyp otyr. Shaǵyn jáne orta kásipkerlikke arnalǵan daıyn óndiris oryndarynda ekonomıkanyń tetigi sanalatyn barlyq salalar qamtylady dep kútilýde. Bastama júzege assa 18 myń halyq jumyspen qamtylyp, shaǵyn jáne orta bızneste 130 kásiporyn iske qosylmaq.
Ulttyq kásipkerler palatasy búgingi tańda elimizdegi kásipkerlerdi qoldap, olardyń isiniń ońǵa basýyna dáneker bolyp otyrǵandyǵy belgili. «Atameken» palatasynyń 2013-2017 jyldar aralyǵynda kásipkerlikti qorǵaý baǵytynda bıznes ókilderinen 22 myńnan astam ótinish túsip, onyń 40 paıyzdan astamy oń sheshimin tapqan. Nátıjesinde, aıyppuldar men memlekettik organdardyń kásipkerlerge qaıtarǵan qarjysy, bıznestiń qorǵalǵan dúnıe-múlkiniń quny 92 mlrd teńgeni quraǵan. Al qala boıynsha 312 shaǵym túsip, onyń 100-ge jýyǵy kásipkerler paıdasyna sheshilgen. Jalpy bir jyl ishinde kásipkerlerge arasha túsýdiń arqasynda 4,77 mlrd teńge únemdelip otyr.
− Astana qalasy kásipkerler palatasy óndirýshilermen kezdesip, týyndaǵan túıtkildi máselelerdi sheshý joldaryn qarastyrady. Búgingi tańda kóptegen kásiporyndarda óz ónimderin satýda qıyndyqtar týyndaıdy. Osy oraıda memlekettik satyp alýdy retteıtin arnaıy komıssııa bar ekendigin, oǵan 200-deı kásipker kelip, óz ónimderin satý máselesin jolǵa qoıǵandyǵyn aıtqym keledi. О́tken jyly 2 mlrd teńgege usynys berilse, bıylǵy jyly 3 aıdyń ishinde 400 mln teńgege otandyq kásipkerlerdiń ónimderin alýǵa usynys berip otyrmyz, – dedi Ǵanı Tasmaǵanbetov.
Buǵan qosa, palata usynǵan jeti bastamany tilge tıek etken ol jer ýchaskeleri, elektr qýaty jáne ınjenerlik-kommýnıkasııalyq jelilerge qosylý týraly aqparatty onlaın alý múmkindigi baryn eske saldy. Qazirgi ýaqytta osy baǵyt boıynsha Astana qalasy sáýlet jáne qala qurylys basqarmasynyń www.saulet.astana.kz jáne www.genplan.saulet.astana.kz saıttarynda ınteraktıvti karta ornalastyrylǵan. Kartaǵa Astana qalasynyń bas jospary men túbegeıli jospar jobasy, tirkelgen jer ýchaskeleri, bos jer ýchaskeleri, aýksıonǵa shyǵarylatyn jer ýchaskeleri, qyzyl syzyq jáne taǵy basqa aqparattar engizilgen.
Qala ishinde saýda-sattyq jasaý jáne qoǵamdyq tamaqtaný boıynsha 600 oryn kásipkerlerge berilipti. Jalpy, Qazaqstanda «Kóshe saýdasy – 1000 saýda orny», «ASTANA TAXI», «Gaz, janar-jaǵarmaı jobasy», «5 myń tonnalyq kókónis saqtaý qoımasy», «Saparjaı-Astana» JShS, «Selınselmash Astana» JShS jekeshelendirý jobasy», «Astana azyq-túlik beldeýin qamtamasyz etý» syndy jobalardyń sátti iske asqandyǵyn ýaqyt kórsetip otyr.
Erkejan AITQAZY, «Egemen Qazaqstan»