Elimizdiń qorǵanys salasyndaǵy basty mindetterdiń biri – áskerdi sapaly kadrlarmen qamtamasyz etý. Egemendiktiń alǵashqy jyldarynda tuńǵysh ret óziniń kásibı armııasynyń negizin qalaǵan Qazaq eli áskerdi zamanýı quraldarmen jaraqtandyrý, ulttyq kadrlar daıyndaý isine úlken kúsh-qaırat jumsalǵany belgili. Osy tusta Elbasynyń bastamasymen armııaǵa bilikti mamandar shaqyryldy, jergilikti oqý oryndarynda jańadan fakýltetter ashylyp, materıaldyq-tehnıkalyq bazasy kúsheıtildi, sondaı-aq elimiz ofıserlerdi ózge memleketterde oqytýdy jolǵa qoıdy.
Arada shırek ǵasyrdan sál asatyn ýaqyt ótkende qorǵanys salasyndaǵy jaǵdaı túbegeıli ózgerip, atalǵan másele túbirimen joıyldy. Elbasy – Qarýly Kúshterdiń Joǵarǵy Bas qolbasshysy N.Nazarbaevtyń tapsyrmasymen qorǵanys salasyn sapaly kadrlarmen qamtamasyz etý keshendi túrde júzege asyrylýda. Osynyń arqasynda armııa sapy bilikti kadrlarmen tolyqty. Solardyń biri – Qorǵanys mınıstrliginiń kadrlar jáne bilim departamentiniń bastyǵy Qaırat Kópbaev.
Memleket basshysynyń Jarlyǵymen 7 mamyr – Otan qorǵaýshylar kúni qarsańynda osy saladaǵy eren eńbegimen, úzdik qyzmetimen erekshelengen azamattarǵa joǵary áskerı ataqtar men synyptyq shender berý dástúrge aınalǵany belgili. Sol dástúr boıynsha bıyl Qarýly Kúshter Joǵarǵy Bas qolbasshysy N.Nazarbaevtyń qolynan general-maıor áskerı ataǵyn alǵandardyń biri – osy Qaırat Rashıduly.
General bolýdy armandamaıtyn jaýynger bolmaıtyndyǵyn eskersek, departament bastyǵynyń qyzmet joly talaı jas sarbazǵa úlgi bolarlyq. Qaraǵandy oblysyna qarasty О́spen aýylynyń týmasy – Q.Kópbaev Qaraǵandy memlekettik ýnıversıtetiniń zań fakýltetin támámdaǵan soń 1991-2009 jyldar aralyǵynda áskerı prokýratýra, qarjy polısııasy salalarynda, «Nur Otan» partııasynyń ortalyq apparatynda qyzmet atqardy. Al 2009 jyly qorǵanys salasyna oralyp, Qarýly kúshterdiń bas basqarmasynyń bastyǵy jáne birneshe departamenttiń bastyǵy qyzmetinde boldy. Munan soń Astana qalasy ákimi apparatynda memlekettik quqyqtyq bólimniń bastyǵy bolyp júrgen ýaqytynda Qorǵanys mınıstrliginiń kadrlar jáne bilim departamentine shaqyrtý alyp, kúni búginge deıin atalǵan ujymdy basqaryp keledi.
Onyń aıtýynsha, búginde densaýlyǵy men minezdemesi talapqa saı árbir azamattyń áskerı salaǵa jumysqa ornalasýyna eshqandaı kedergi joq. Onyń ústine qorǵanys salasyna kelýge yntalandyratyn jeńildikter de jeterlik. Qorǵanys mınıstrligine qarasty oqý oryndarynda áskerı salaǵa qajetti mamandyqtardy daıarlaıtyn fakýltetter de qajetti deńgeıde ashylǵan. Tipti qyz-kelinshekterdiń de áskerı salanyń esep, qarjy, medısına salalarynda jumys isteýlerine múmkindikteri bar.
– Sońǵy jyldardyń ózinde áskerı qyzmetshilerdiń jalaqylary joǵarylap, turmystyq máselelerin sheshýge basymdyq berildi. Olardy turǵyn úımen qamtamasyz etýdiń qarapaıym ári tıimdi joly bekitildi. Tıisinshe, memleket tarapynan áskerı salaǵa talap ta kúsheıtildi. Qazirgi kúni osy salany bilikti ári jigerli jas mamandarmen tolyqtyrýǵa basymdyq berilýde. Osyndaı júıeli jumystardyń arqasynda qazir mamandar tapshylyǵy joıyldy. Búginde bul salada qyzmet etý azamattarymyz úshin úlken mártebe sanalady. Jyl ótken saıyn zańnamalar da jetildirilip, salany quqyqtyq turǵydan nyǵaıtýdyń jan-jaqty sharalary da júzege asýda. Bilimin odan ári tereńdetemin, biliktilikti arttyramyn degen qyzmetkerlerge úlken múmkindikter bar, – deıdi ol.
Byltyr ǵana engizilgen tyń jańalyq retinde buryn áskerı qyzmetke qatysy bolmaǵan, áskerı ýchılıshede, áskerı oqý oryndarynda áskerı daıyndyqtan ótpegen azamattar tek 32 jasqa deıin áskerı qyzmetke kire alatyndyǵyn aıtýǵa bolady. Bir kezderi qyzmet etken nemese áskerı qyzmetke qatysy bar adamdardyń 37 jasqa deıin áskerı qyzmetke kelýine múmkindik bar. Bul – áskerı qyzmetkerlerdi «jasartýdyń» amaly. Qaırat Rashıduly О́spen aýylynan shyqqan tuńǵysh general retinde óz ómirine áke tárbıesiniń yqpaly zor bolǵandyǵyn aıtady. Týǵan ólkesinde tas joldar salǵyzyp, kanal qurylysyna jaýapty bolyp, partııada jaýapty qyzmetter atqaryp, keńshar basqarǵan Rashıd Búrkitbaıuly ulynyń qyzmet jolyn, jetistikterin kóre almaı ketti. Biraq tal besikten bastalǵan ákeniń ulaǵatty tárbıesi Qaırat Rashıdulyna maqsat-murattarǵa jetý jolynda udaıy temirqazyq bolyp keledi.
Serik ÁBDIBEK, «Egemen Qazaqstan»