Bala dárigeri bolýdyń baqyty bólek

Bir qyzyǵy, balamen jumys isteıtin úlkenderdiń, mysaly, tár­bıeshi-muǵalimderdiń de boılarynda kishkentaılarǵa tán qasıetter ańǵarylyp qalady. Bala dárigeri de solaı. Aldyna aýyryp kelgen balany qushaqtap, erkeletip, aıalap otyryp qaraıtyn aq halatty abzal jannyń júzinen de jylylyq esip turady. Atyraý oblysynyń Jylyoı aýdanyndaǵy ortalyq aýdan­dyq aýrýhananyń bala dá­rigeri Gúlzıpa Qalıevany el osyndaı jaqsy minezi úshin qurmetteıdi.

Orta mektepti oıdaǵydaı aıaqtaǵan balaýsa qyzdyń jalǵyz armany bar edi. Ol dáriger bolsam deıtin. On bir balaly otbasynan shyqqan Gúlzıpa Aldııarqyzy baýyr­mal, meıirimdi bolyp ósti. M.Ospanov atyndaǵy Batys Qazaqstan memlekettik medısına ýnıversıtetinde bilim alyp, pedıatr mamandyǵyn tańdady. Bıyl mine, otyz úshinshi jyl, mamandyǵyna adaldyqpen qyzmet etip ke­ledi. Muǵalimder men dári­ger­ler jappaı bazar jaǵa­lap ketken toqsanynshy jyl­dardaǵy toqyraýda da ol súıik­ti isinen qol úzgen joq. 

Dúnıede baýyr etiń – ba­lańnyń aýyrǵanynan aýyr ne bar? Osy jyldar ishinde Gúlzıpa Aldııarqyzy san túrli taǵdyrmen kezikti. Sábıin ajaldan arashalaı almaı zar jylap qalǵan anany kórdi, týabitti dertke shaldyqqan balany kórdi, solarmen birge qamyqty, qaıǵyrdy. Biraq bir sábı dúnıege kelse, bir náresteniń aýrýynan aıyqqanyn kór­se, rıza bolǵan ata-ana­nyń alǵysyn estise, qıyn­dyq­tyń bárin umytyp, solarmen birge qýandy. О́zi qaraıtyn ýchaskedegi barlyq balany ol jatqa biledi. Den­saýlyqtarynda dimkástik bar balalar úshin alańdap otyrady. Jazyp bergen dárisin ýaqytynda qabyldap júrgen-júrmegenin de tekserý kúndelikti ádetine aınalyp ketken. 

«Men 25 jyl boıy Gúl­zıpa Aldııarqyzymen birge bir kabınette jumys iste­dim», – deıdi medbıke Mas­kýra Elemesova. – Osyn­daı jaıly, júregi jy­ly adam­men qyzmettes ekenim­di maqtanyshpen aıtyp júremin. Naǵyz bala dári­geri osyndaı bolýy kerek shyǵar, ol qolyna alǵan sábı jylaǵanyn qoıady. Balany erkeletip, áldılep, oınatyp otyryp densaýlyǵyn tekseredi». 

«Bala dárigeri bolý­dyń baqyty bólek», – deı­di Gúlzıpa Qalıeva. – 31 jyl pedıatr boldym, qa­zir medısınaǵa engizil­gen ózgerister boıynsha ot­basylyq dárigermin. Pedıa­trııa fakýltetteri jabyldy degendi estigende kóńil-kú­ıim tústi. Bolashaǵyn oı­laǵan el balaǵa jaǵdaı jasaı­dy, osy rette ana men ba­la densaýlyǵyn qorǵaýǵa baǵyt­talǵan memlekettik baǵ­darlamalardan el úlken úmit kútedi, men de kútemin».

Tájirıbeli, jastarǵa úıreter taǵylymy mol dá­ri­gerdiń alǵan maqtaý qa­ǵaz­dary da, alǵys hattary da kóp. Biraq ol aldyna aýyryp kelgen jannyń, meıli jas bolsyn, meıli kári bolsyn, qulan taza aıyǵyp ketkenin kórgennen artyq qýanysh bar dep oılamaıdy. Jumysynda senimdi seriktes, bilikti dá­riger bolsa, úıinde eki bala­nyń anasy, asyl jar, ónegeli kelin. 

Qarapaıym adamı baqyt degen de osy bolsa kerek. 

Baqytgúl BABASh, «Egemen Qazaqstan»

Atyraý oblysy,  Jylyoı aýdany