Almatydaǵy «Qazaqstan» qonaq úıinde Túrki keńesiniń Týrızm boıynsha jumys toby bas qosty. Jıyn barysynda atalǵan uıymǵa múshe memleketter arasynda týrızm salasyn damytý maqsatynda qolǵa alynǵan «Zamanaýı Jibek joly» jobasy jan-jaqty talqylandy.
Qazaqstan, Túrkııa, Ázerbaıjan jáne Qyrǵyzstan ókilderi qatysqan kezdesý barysynda týrızm taqyrybynda talaı tartymdy áńgimelerdiń tıegi aǵytyldy. Alma-kezek sóz alǵan ár tarap osy jobanyń mindeti men maqsaty, máni men mańyzyna toqtala kele, bul kúnderi osy baǵytta qandaı jumystar atqarylyp jatqany jaıynda baıandady. Sonymen qatar olar aldaǵy josparlarymen de bólisti.
– 2014 jyly Bodrýmda ótken Túrki keńesiniń sammıtinde qabyldanǵan sheshimge sáıkes, Qazaqstan, Túrkııa, Qyrǵyzstan jáne Ázerbaıjannyń tarıhı-mádenı muralaryn álemdik deńgeıde nasıhattaı otyryp, atalǵan elderdiń týrızm salasyn damytýǵa barynsha kúsh salýymyz qajet. Halyqaralyq týrızm salasyndaǵy sońǵy úrdis – qazirgi kezde týrıster tek teńiz ben jaǵajaıda demalýmen shektelip qalmaı, sol elderdiń mádenı muralaryn tanýǵa barynsha umtylady. Osy oraıda, Qazaqstanda da kórikti jerler az emes ekeni barshaǵa aıan. Almaty, Taraz, Shymkent jáne Túrkistandaǵy tarıhı eskertkishter, Arystan Bab pen Qoja Ahmet Iаsaýı sııaqty álemge tanymal tulǵalar, Ortalyq Azııaǵa ǵana tán sáýlet óneri jáne basqa da keremetter ózge memleketterden kelgen qonaqtardyń qyzyǵýshylyǵyn týdyratynyna senimdimiz. Biz usynatyn týrıstik pakettiń baǵasy Eýropa jáne Amerıka naryǵymen salystyrǵanda edáýir arzan ekenin de atap ótken jón. Al Túrkııa men basqa elder úshin týrısterdiń qaltasyna salmaq túsirmeıtin baǵa qarastyrylyp jatyr», – dedi Túrki keńesi Bas hatshysynyń orynbasary О́mer Kodjaman.
Túrkııanyń Almatydaǵy Bas konsýly Ryza Qaǵan Iylmaz Túrkııany kórýge qushtar Qazaqstan azamattarynyń qatary kún ótken saıyn kóbeıip kele jatqanyn jáne Túrkııa tarapynan da Qazaq eline kelýge qushtarlyq tanytyp otyrǵandardyń sany artqanyn aıtty. О́z sózin ol: ««Zamanaýı Jibek joly» jobasy túrki elderiniń bir-birine tanylýyna jáne nasıhattalýyna septigin tıgizetini anyq», – dep qorytyndylady.
Ǵalym SÚLEIMEN, «Egemen Qazaqstan»
ALMATY