Bıik shyńdary kók tiregen aqbas taýlar kórinedi alystan. Onyń ber jaǵyndaǵy jota-jondar teńiz tolqyndary sekildi kógildir munarǵa oranyp, tolqyp jatqandaı áserge bóleıdi.
Kúnge shaǵylysyp, kúlim qaqqan aına kóldiń jaǵasyndaǵy boz úıler alystan kóz salǵan kisige sý betinde baıaý qalqyp júrgen bir top aqqýǵa uqsaıdy. Al shyndyǵynda, bul – qyrǵyzdyń maıtalman aqyny Toqtaǵul Satylǵanovtyń 150 jyldyq mereıtoıyna arnalyp tigilgen úıler bolatyn.
...Kól ortasynda bir keme tur. Onyń palýbasyna ilingen qyrǵyzdyń qyzyl jalaýy áýelde sý betindegi qyzǵaldaq sekildi kóz tartady.
Kóńilińiz eleńdep, kókoraı kóktemdi ańsaıdy. Shirkin-aı, mynaý ólke qyzǵaldaqqa oranyp jatqan shaqta keler me edik deısiz qyzyǵyp. Kól jaǵasyndaǵy eshki tal da sizdiń osy oıyńyzdy quptaǵandaı baıaý yrǵalyp, basyn ızep qoıady.
Bul ólkeniń jalpy ataýy – Ketpen tóbe. Al manaly beri bizdiń kól dep oılap kele jatqanymyz kádimgi Ortalyq Azııa kartasynan oıyp turyp oryn alatyn Toqtaǵul sý qoımasy.
Bir qyzyǵy, bala kú-nińizde ájeńizdiń tilin almaı, qyńyraıyp: «Maǵan búıtip ursa berseńiz, kókemniń úıine ketem de qalam!» dep qorqytpaq bolǵan kezińizde, ol kisiniń: «Oı, tentek! Ketpeseń, Ketpen tóbeden asyp ket!» deıtin sózi esińizge túsip, eriksiz jymııasyz.
Kózdi ashyp-jumǵansha óte shyqqandaı bolyp kórinetin sol bir tátti kúnderdi saǵynyp otyryp oılaısyz: «Iаpyr-aı, baıaǵy ájem aıtqan Ketpen tóbe osy emes pe eken?!»
Nurǵalı ORAZ, «Egemen Qazaqstan»