Elimizde birqatar sheteldik tele-radıo arnalardyń tirkeý týraly kýálikteri qaıtarylyp, olardyń aqparattyq keńistigimizde habar taratýy toqtatyldy. Atap aıtqanda, bul tizimge engen sheteldik 88 telearnanyń ıeleri Qazaqstan zańynyń talaptaryn oryndamaǵan.
2017 jyly «Teledıdar jáne radıo habarlaryn taratý týraly» Qazaqstan Respýblıkasy zańynyń 42-babyna engizilgen ózgertýlerge sáıkes elimizdiń aýmaǵynda habar taratatyn barlyq sheteldik tele jáne radıo arnalar osy Zań qoldanysqa engizilgen kúnnen bastap alty aı ishinde Qazaqstan aýmaǵynda zańdy tulǵany nemese ókildigin (fılıalyn) tirkeýge mindettelgen edi.
Atalǵan zań 2018 jyldyń 9 qańtarynda kúshine engendikten, teleradıolardy tirkeýge 9 shildege deıin ýaqyt berildi. Mine, arada alty aı ótkende Aqparat jáne kommýnıkasııalar mınıstrligi kýálikteri qaıtarylyp, habar taratýy toqtatylatyn arnalardyń tizimin jarııalap otyr. Bul – zańnyń talaby jáne eldiń aqparattyq qaýipsizdigin saqtaýdyń mańyzdy bir tarmaǵy ekeni daýsyz.
Aqparat salasyndaǵy osynaý ózgeristi Aqparat jáne kommýnıkasııalar mınıstri Dáýren Abaev óziniń áleýmettik jelidegi paraqshasynda jarııalady.
«Búginde Qazaqstanda sheteldik 307 teleradıo arna tirkeýli. Olardyń jumysyn rettep otyrý maqsatynda mınıstrlik jyl basynda zańnamalarǵa ózgeris engizýge muryndyq bolyp, soǵan sáıkes barlyq sheteldik telearnalar Qazaqstan Respýblıkasynda ókildikterin ashýǵa mindetteldi. Olarǵa jańa talaptardy oryndaýy úshin jartyjyldyq ýaqyt berildi. Qazirgi kúni 219 telearna atalǵan talapty oryndady. Qalǵan 88 telearnanyń habar taratýyn toqtatý maqsatynda mınıstrlik arnaıy buıryq ázirledi», dep jazdy D. Abaev.
Qazirgi ýaqytta elimizdiń aýmaǵynda habar taratýdy toqtatatyn arnalardyń tolyq tizimi Aqparat jáne kommýnıkasııalar mınıstrliginiń saıtynda tur.
Bul arada ýákiletti organnyń zań aıasyndaǵy jumysynyń tııanaqty jasalǵandyǵy baıqalady. О́ıtkeni mınıstrlik jyl basynan beri ókildikterin ashpaǵan sheteldik tele-radıo arnalardyń ıelerine óz qyzmetin Qazaqstan zańnamasy talaptaryna sáıkestendirý qajettiligi týraly aqparattyq-túsindirý jumystaryn júrgizgen bolatyn.
Endi Qazaqstan aýmaǵynda habar taratýyn jalǵastyrýǵa qyzyǵýshylyq tanytatyn sheteldik tele-radıo arnalar óz ókildikterin ashyp, qaıtadan tirkeýge turýy qajet.
Jýyrda ǵana mınıstrlik «Shalqar» radıosynyń taralý aýqymyn keńeıtip, ásirese, shekaraǵa jaqyn eldi mekenderdi qamtýǵa qol jetkizgendigin jazdyq. Osy eki qadamnyń da túp-tórkini aqparattyq qaýipsizdik turǵysyndaǵy mańyzy joǵary másele bolyp otyr.
Serik ÁBDIBEK,
«Egemen Qazaqstan»