Astana qalasynda Ishki ister organdary aqparattyq-analıtıkalyq bólinis qyzmetkerleriniń arasynda «Úzdik maman» baıqaýy máresine jetti.
«Úzdik maman» baıqaýynyń negizgi maqsaty – aqparattyq-analıtıkalyq bólinis qyzmetkerleriniń kásibı sheberligin shyńdaý, tájirıbe almasý, olardyń qyzmettegi tıimdiligin arttyrý bolyp tabylady.
Atalǵan sharaǵa oblystyq Ishki ister departamentteri boıynsha úzdik dep tanylǵan 17 qyzmetker qatysty.
Baıqaýdyń alǵashqy kúni polısııa qyzmetkerleri ekstremaldy jaǵdaıda daıyndyqtaryn tekserý úshin atys, dene daıyndyǵy jáne kúrestiń jaýyngerlik tásilderi boıynsha synaqtan ótti. Sonymen qatar olardyń fýnksıonaldyq mindetterine qatysty praktıkalyq tapsyrmalar berildi.
Ekinshi kúni baıqaý qatysýshylary Qazaqstan Respýblıkasynyń zańnamalaryn jáne ishki ister organdarynyń qyzmetin retteıtin basqa da quqyqtyq aktilerdi meńgerýi boıynsha testileýden ótti.
Jarystyń qorytyndysy boıynsha Jambyl oblysy IID-niń ınspektory Jansaıa Abdraemova «Úzdik maman» atandy. Al qalǵan oryndardy qaraǵandylyq Tatıana Bereznıskaıa men qostanaılyq Natalıa Soı ózara bólisti. Jeńimpazdarǵa estelik syılyqtar men madaqtaý qaǵazdary tabys etildi.