Batys Qazaqstan oblysyndaǵy Jympıtyda Dýlat Baqyt esimdi jigit turady. О́ziniń aınalyspaıtyn sharýasy joq. Aǵashtan ústel jasaıdy, arasynda ınternet saýdamen aınalysady. Aýdanda kásiptik oqý, semınar sııaqty jıyn bolsa, tizimge birinshi tirkeledi. Ákimdikte jınalys ótetin bolsa, aldyńǵy qatarda taǵy da Dýlat otyrady. Konsert bolsa da solaı.
Budan bólek Dýlattyń 12 jyldan beri turaqty túrde aınalysatyn maýsymdyq kásibi bar. Ol ala jazdaı laı quıyp, saman kirpish quıady.
Dýlat úshin jumys kestesi tańǵy saǵat 4-5-te bastalady. Tańmen talasa turatyn jigit bir jazda 10-12 myń kirpish quıady. Kirpishi keýip bolmaı klıent tabylady. Jympıtylyqtar Dýlattyń saman kirpishin arnaıy tapsyryspen talasa satyp alady. Bir kirpishtiń baǵasy – 55-60 teńge.
Dýlattyń aıtýynsha, búginde qurylysqa paıdalanylatyn materıal túri kóbeıgenimen, saman kirpishke suranys áli bar kórinedi.
– Kirpish quıý úshin qara kúsh emes, ep pen yńǵaı kerek. Árıne el aýyr jumys dep jatady. Aýyry aýyr ǵoı, biraq úırenip qalǵandyqtan ba, men úshin asa qıyn emes. Osy kásiptiń ózi otbasyma kádimgideı qarjylaı kómek bolyp tur, – deıdi eńbekqor aýyl jigiti.
Epti jigit qosymsha kásip retinde Jympıtyda ınternet saýdany damytsam dep te nıettenip júr. Aldaǵy ýaqytta naýbaıhana jáne shashtaraz ashyp, halyqqa qyzmet kórsetýmen de aınalysqysy keledi. Qazir jabdyqtar alý jaǵyn oılastyryp jatyr. Oıynyń júzege asýyna bir kómegi bolar dep, Syrym aýdandyq halyqty jumyspen qamtý ortalyǵy janynan uıymdastyrylǵan «Bastaý» bıznes jobasy aıasynda kásipkerlik negizderine oqyp alǵan.
Aıtpaqshy, Dýlat Baqyt áleýmettik jelilerde ózine tán órnegi bar óleńderimen de tanymal. Sol óleńniń arqasynda byltyr Syrym aýdanynan joldama alyp, «Tanylmaǵan talant» jobasynyń oblystyq kezeńine qatysty.
Aman júr, dúnıeniń bir ketigine kirpish syndy qalanyp júrgen aýyl aqyny!
Baýyrjan ShIRMEDINULY
Batys Qazaqstan oblysy,
Syrym aýdany