Jolaýshyǵa oı serik. Jańa ǵana jeńil kóliktiń ishindegi radıo jelisinen oqys oqıǵa jaıly aqparat estigenbiz. On altydaǵy bozbala kóp qabatty úıdiń altynshy qabatynan sekirip ketip, opat bolypty. Sebep, ata-anasy noýtbýk ápermegen. Baıǵus bozbala. Aman bolsa, alda qansha ǵumyr bar, áldeneshe noýtbýk, bálkim odan qymbatyn ustamas pa edi?..
Stepnıak qalasyna jetkenbiz. Qonaq úıge ornalastyq. Záýi bir sebeppen ekinshi qabattaǵy aıaq kıim jóndeıtin sheberhanaǵa bas suqqanbyz. Suńǵaq boıly, qaratory jigit qarsy aldy. О́z jaıyn ymmen uqtyrǵan. Tilsiz eken. Biz qolymyzdaǵy qalam men bloknotymyzdy kórsettik. Soǵan qarap, qaı kásiptiń adamy ekenimizdi uqqandaı. Qalypty mashyqpen aýany aıqysh-uıqysh syzǵylap, áldeneni aıtyp jatyr. О́kinishke qaraı ymyn uǵa almadyq. Des bergende bizdiń jaıymyzdy kórgen jigit aǵasy osyndaǵy sańyraýlar qoǵamynda Roza Aıtmaǵanbetova esimdi aýdarmashynyń bar ekendigin jetkizgen. Jýrnalıst ekenimizdi aıtqan soń Roza apaı birden kelise ketti.
Sheberdiń aty-jóni Iýrıı Jýkov. Týmysynan tilsiz. 2016 jyly óz qarjysyna aıaq kıim jóndeıtin sheberhana ashyp alypty. Sodan beri el alǵysyna bólenýde. Tozǵan aıaq kıimdi jamap-jasqaý baǵasy arzan ári kelgen adamdy jylyshyraımen qarsy alady. Tilsiz-aq támam elmen til tabysyp júr. Jalǵyz aıaq kıim jóndeýmen ǵana emes, sportpen de aınalysady. Aýdan, oblys bylaı tursyn, respýblıkalyq spartakıadalarda top jarǵan. Múmkindigi shekteýli «Úmit» spartakıadasynyń áldeneshe márte jeńimpazy. Aýyr atletıka jáne armrestlıngpen kúndelikti shuǵyldanady. Jatyp kóterýden 75 keli salmaq mejesinde. Meniń kóz aldyma aýyr ziltemirdi emes, taǵdyrdyń salmaǵyn qınalmaı kóterip júrgendeı elestep ketti.
Suńǵaq boıly, ádemishe jigittiń júzinde taǵdyr talqysyna degen toryǵý joq. Qaıta ómirge qushtarlyqtyń lebi esip tur.
– Jarysqa daıyndalyp jatyrmyn,– deıdi ol aýdarmashy arqyly aıtqan áńgimesinde, – buryn jaǵdaıym qıyndaý edi, qazir bir bólmeli úı aldym. Anam ekeýimiz turyp jatyrmyz. О́z tabysym ózime jetedi. Anam Nadejda Korkına qyryq jyl muǵalim bolǵan kisi.
– О́te eńbekqor, taza, adal jigit. Aýdan ortalyǵyndaǵy muqtaj jannyń bári osynda keledi. Keıbireýlerdi músirkep, tegin de kómektese salady. Anada bir kelsem, on eki múshesi saý, tepse temir úzetin ózimizdiń bir jigit Iýrııge tegin istep bershi dep qolqa salyp tur eken. Uıalǵanym-aı, – deıdi kóldeneńnen kılikken Qappas Jansúgirov aqsaqal.
Kún astynda júrgenmen, kúrsinýge sebep kóp qoı. Áıtse de taǵdyrdyń salǵan isine moıymaǵan sheberdiń tirshiligine tánti boldyq. Sol kezde ata-anasyna bolmashy zat úshin ókpelep, dúnıeden baz keshken bozbalanyń esimizge túskeni.
Baıqal BAIÁDIL,
«Egemen Qazaqstan»