Búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda qoǵamdyq qaýipsizdikti qamtamasyz etý boıynsha qabyldanyp jatqan sharalar men jergilikti polısııa qyzmetiniń jumysy týraly QR ishki ister mınıstri Qalmuhanbet Qasymov baıandady.
Ishki ister mınıstri Qalmuhanbet Qasymov búgingi Úkimet otyrysynda elimizdegi qylmys túrleriniń basym bóliginiń kórsetkishteriniń tómendegenin atap ótti.
«Asa aýyr, aýyr qylmys túrleriniń, sondaı-aq ortasha jáne asa aýyr emes qylmystar sany azaıdy. Olardyń ishinde: tonaý, urlaý, buzaqylyq, zorlyq-zombylyq jáne basqa da qylmystar bar. Buryn sottalǵandardyń, sondaı-aq kámelettik jasqa tolmaǵandar qylmysynyń tómendeýi baıqaldy», — degen Q. Qasymov osy jáne basqa da jaqsy ózgeristerdiń quqyq buzýshylyqtyń aldyn alý, qoǵamdyq tártipti saqtaý, jol qozǵalysy qaýipsizdigin qamtamasyz etý boıynsha IIM-niń óńirlik ákimderimen birlese atqarǵan jumystarynyń nátıjesi ekenin aıtty.
Sondaı-aq, Ishki ister mınıstri Q. Qasymov ákimdikter tarapynan qoldaýdy qajet etetin bir qatar máselelerdi atap ótti. Birinshisi — quqyq buzýshylyqtardyń aldyn alý. Ákimdikter bul qyzmettiń áleýetin ázirge jetkilikti deńgeıde paıdalanyp jatqan joq. Urlyqtyń aldyn alý jumystaryna jergilikti organdar, uıymdar men mekemeler, qoǵamdyq qurylymdar jáne turǵyndar da atsalysýy qajet.
Ekinshisi — jasóspirimder qylmysynyń aldyn alý.
«Mekteptegi» ınspektorlar tájirıbesin damytý qajet. Qazirgi tańda mektepterde 2178 ınspektor qyzmet kórsetýde. Olar kúndelikti mektepterdiń ákimshiligimen, ata-analar komıtterimen jumys isteıdi. Qosymsha taǵy 1900 astam qyzmetker qajet», — dep ishki ister mınıstri, bul jasóspirimder arasyndaǵy qylmystyń, maskúnemdiktiń, nashaqorlyqtyń aldyn alýǵa múmkindik beretinin aıtty.
Úshinshisi — qoǵamdyq tártipti saqtaý. Q. Qasymovtyń baıandaýynsha, búginde qoǵamdyq tártipti saqtaýda beınebaqylaý júıeleri kóp ról atqarady. Qazirgi ýaqytta shamamen 6 myń beınebaqylaý kamerasy ornatylǵan. Onyń bári Jedel basqarý ortalyqtaryna tikeleı qosylǵan. Olardyń kómegimen 288 myńnan astam ákimshilik quqyq buzýshylyqtyń joly kesilip, 2074 qylmys ashyldy.
О́ńirlerde «Qaýipsiz aýla» jobasy oıdaǵydaı iske asyrylyp jatyr. Osy joba aıasynda 67 myńnan astam beınekamera ornatylǵan. Bıyl olardyń kómegimen úılerdiń aýlalarynda 1,5 myńnan astam qylmys ashylǵan, 212 myńnan astam tártip buzýshylyq anyqtalǵan.
«Qabyldanyp jatqan sharalar jalpy kóshe qylmysyn azaıtyp, usaq tártip buzýshylyqtardy jyldam anyqtaýǵa jol ashýda. Bul qoǵamda «tártipsizdikke degen nóldik tózimdilik» qaǵıdatyn qalyptastyrýǵa yqpal etedi», — dep Q. Qasymov, óńirlerde de zamanaýı beınebaqylaý júıelerin damytý jónindegi usynysyn bildirdi.
Sonymen qatar, onyń aıtýynsha, QR IIM ázirlegen biryńǵaı tehnıkalyq saıasatty ustaný qajet. Bul úılesimdilikti jáne barlyq engiziletin júıelerdi biryńǵaı respýblıkalyq jelige biriktirýdi qamtamasyz etýge múmkindik beredi.
Tórtinshisi — jol qaýipsizdigi. Ishki ister mınıstriniń aıtýynsha, atalǵan baǵytta JQE buzýdy jazyp alatyn avtomatty júıelerdi belsendi túrde engizý qajet. Máselen, memlekettik-jekemenshik áriptestik jobasy sheńberinde 400 jol qıylystaryn jáne 300 jelilik jol ýchaskelerin «Sergek» júıesiniń foto-beınetirkeý kameralarymen jabdyqtaý jumystary bastaldy. Jyldyń basynan beri olar 260 myń ákimshilik quqyq buzýshylyqty tirkedi, bıýdjetke 740 mln teńgeden astam sommaǵa aıyppul óndirip alyndy. Sonyń nátıjesinde Astana qalasyndaǵy JKO sany 20%-ǵa, qaıtys bolǵandar sany 50%-ǵa jáne jaraqat alǵandar sany 21%-ǵa azaıdy. Tıisinshe, jol qozǵalysyn baqylaýdy júzege asyratyn qyzmetkerler sany qysqardy. Jaqyn arada osyǵan uqsas jobalardy Aqtóbe, Atyraý, Pavlodar, Batys Qazaqstan jáne Shyǵys Qazaqstan oblystarynda iske asyrý josparlanǵan.