11-synyp oqýshylary UBT-dan synaq tapsyrdy. Bilim jáne ǵylym mınıstrliginiń málimetinshe, 18-20 qańtar aralyǵynda 35 838 talapker synaqqa qatysqan. Onyń ishinde 61-i bilimin aǵylshyn tilinde synaǵan. Al shet tilinde úzdik tapsyrǵan talapkerge «Bolashaq» stıpendııasyn ıelenýge múmkindik bar.
Oqýshylar testileýdi qazaq, orys jáne aǵylshyn tilderinde tapsyra alady. Al bıyldan bastap talapkerler UBT-ny tórt ret tapsyra alatyn boldy. «Bul bastamanyń maqsaty – mektep bitirýshilerdiń JOO-ǵa túsý múmkindigin arttyrý», dep túsindirdi jaýapty vedomstvo ókili. Mınıstrliktiń málimetinshe, aǵylshyn tilinde tapsyrýǵa nıettilerdiń qatary jyl saıyn kóbeıip keledi. Máselen, 2018 jyly 25 oqýshy bolsa, onyń sany bıyl 36-ǵa artqan.
Osy kórsetkishke «Halyqaralyq baǵdarlamalar ortalyǵy» AQ qyzyǵýshylyq tanytqan kórinedi. Sonyń nátıjesinde atalǵan ortalyq basshysy Janbolat Meldeshov testi aǵylshyn tilinde úzdik tapsyrǵan talapkerge grant bólýge daıyn ekendigin jetkizgen. Sonymen qatar birqatar sheteldik seriktes JOO-lardy da belgilepti. Bul shet tilinde tapsyryp jatqan oqýshylardy yntalandyrý maqsatynda qolǵa alynǵan.
J. Meldeshovtyń málimdeýinshe, 2019 jyly sheteldik JOO-lar bizdiń azamattarǵa 40 000 grant bólýge daıyn eken. Bul – árıne ár talapkerdiń tegin bilim alýǵa múmkindigi baryna dálel. «Mektep túlekteri UBT sertıfıkatymen qazaqstandyq JOO-larǵa ǵana emes, sheteldik oqý oryndaryna da túse alady. Mysaly, Túrkııa joǵary oqý oryndary bizdiń sertıfıkatymyzben qabyldaıdy. Ol úshin aǵylshyn jáne túrik tilderin bilýi kerek», deıdi ol.
«Bolashaq» baǵdarlamasyn júzege asyrýdyń bastapqy kezeńinde bakalavr dárejesi boıynsha shetelge joldama berilgen. Biraq keıin bul joıylyp, tek magıstratýra men doktorantýra boıynsha ǵana shekaradan shyǵýǵa múmkindik boldy. Qazir de solaı. Alaıda endi atalǵan memlekettik baǵdarlamamen bakalavrdy da álemdegi beldi oqý oryndarynda bitirýge bolady. Biraq bul – UBT-ny shet tilinde tapsyrǵan túlekterge ǵana berilgen múmkindik. Ol úshin 60-tyń aınalasyndaǵy bilimdi básekesterdi basyp ozý kerek.
Aıdana ShOTBAIQYZY,
«Egemen Qazaqstan»