«Nur Otan» partııasy Tóraǵasynyń birinshi orynbasary Máýlen Áshimbaevtyń tóraǵalyǵymen partııa Saıası keńesiniń otyrysy boldy. Oǵan Saıası keńes músheleri, sonyń ishinde Parlament depýtattary, atqarýshy memlekettik organdardyń jáne ÚEU basshylary, kásipkerler, dárigerler, bilim, mádenıet, sport salasynyń ókilderi, Qazaqstan halqy Assambleıasynyń músheleri jáne taǵy basqalar qatysty. Sondaı-aq otyrysqa partııanyń kezekti XVIII seziniń delegattary da shaqyryldy.
Otyrysty ashqan M.Áshimbaev aldymen qatysýshylardy «Nur Otannyń» 20 jyldyǵymen quttyqtady. Osy mereıli dataǵa oraılastyrylǵan partııanyń kezekti XVIII seziniń mańyzyna toqtalǵan ol atalǵan jıynda «Nur Otannyń» jańa baǵyt-baǵdary aıqyndalyp, mańyzdy máseleler talqylanatynyn sóz etti.
Saıası keńestiń otyrysynda qaralǵan negizgi máselelerdiń biri «Nur Otan» partııasynyń 2030 jylǵa deıingi «Baqýatty qoǵam: onjyldyqtyń 10 maqsaty» atty jańa baǵdarlama jobasyn talqylaý boldy. Partııa Tóraǵasynyń birinshi orynbasary baǵdarlamanyń negizinen áleýmettik sıpatqa ıe ekenine nazar aýdardy.
– Partııa Tóraǵasynyń tapsyrmasyna sáıkes, partııanyń 2030 jylǵa deıingi jańa baǵdarlamasy daıyndaldy. Bul qujatta Elbasynyń elimizdi jan-jaqty jańǵyrtý baǵdarlamasyn júzege asyrýǵa partııanyń qosatyn naqty úlesi men jumysy kórsetilgen. Baǵdarlama jobasy bastaýysh partııa uıymdarynyń jınalystary men partııanyń aýmaqtyq jáne aımaqtyq fılıaldarynyń konferensııalarynda keńinen talqylandy. Nátıjesinde qujat áleýmettik sıpatqa ıe bolyp, azamattardyń turmys sapasyn jaqsartýǵa baǵyttaldy, – dedi M.Áshimbaev.
Otyrys barysynda baǵdarlamanyń negizgi baǵyttary boıynsha partııa hatshysy Ilıa Terenchenko baıandap berdi. Odan bólek, Saıası keńestiń músheleri: M.H.Dýlatı atyndaǵy Taraz memlekettik ýnıversıtetiniń rektory M.Sarybekov, Pavlodar oblystyq perınataldy ortalyǵynyń bas dárigeri A.Ospanova jáne «Agrofırma «Rodına» JShS-nyń dırektory I.Saýer jańa baǵdarlamanyń basymdyqtary jaıynda aıtty.
Talqylaý nátıjesinde Saıası keńes músheleri baǵdarlama jobasyn maquldap, ony «Nur Otan» partııasynyń kezekti XVIII seziniń qaraýyna usyný týraly sheshim qabyldady. Sonymen qatar sezde partııa Jarǵysyna ózgertýler men tolyqtyrýlar engizý jáne Saıası keńes pen Ortalyq baqylaý-tekserý komıssııasynyń eseptik kezeńdegi jumysyn qorytyndylaý sııaqty máseleler de talqylanady dep kútilýde. Soǵan baılanysty Saıası keńestiń otyrysynda atalǵan máseleler de nazarǵa alynyp, talqyǵa salyndy.
Sondaı-aq sezde ókilettik merziminiń aıaqtalýyna baılanysty Saıası keńes pen Ortalyq baqylaý-tekserý komıssııasynyń múshelerin saılaý máselesi de qaralmaq. Otyrysta Saıası keńes músheleri bul máselege de kóńil bóldi. Odan bólek, otyrysta kezekti XVIII sezdiń jumys organdary – Mandattyq, Eseptik, Redaksııalyq komıssııalardyń jáne sezd Hatshylyǵynyń jeke quramdary qaralyp, usynyldy. Jıyn sońynda partııa Tóraǵasynyń birinshi orynbasary atalǵan sezdiń partııa úshin mańyzy zor ekenine taǵy bir nazar aýdardy.
– Sezdiń qaraýyna partııamyzdyń ári qaraı damýyna úlken áser etetin mańyzdy máseleler usynylyp otyr. Sezd jumysyna Elbasy, partııa Tóraǵasynyń qatysýy da bizge úlken jaýapkershilik júkteıdi. Sondyqtan sezdiń el damýyna da tıgizer áseri mol deýge tolyq negiz bar, – dedi M.Áshimbaev.
Aıta keteıik, Saıası keńes partııanyń joǵary ókildik organy. Onyń ókilettigine partııa seziniń sheshimderin oryndaý boıynsha partııa organdary qyzmetiniń negizgi baǵyttaryn anyqtaý, partııanyń qatysýymen bolatyn saılaý kampanııalaryna qatysty máselelerdi qaraý, partııa atynan saıası málimdemeler men úndeýlerdi qaraý jáne engizý, partııa Tóraǵasynyń usynysy boıynsha óz quramynan partııa Saıası keńesiniń Bıýro múshelerin saılaý, partııa sezin shaqyrý, olardyń kún tártibin qalyptastyrý jáne basqa da máselelerdi sheshý kiredi. Partııa Saıası keńesiniń ókilettik merzimi – 4 jyl.
Joldybaı BAZAR,
«Egemen Qazaqstan»