Sybaılastyqpen kúreste qazaq-qytaı seriktes

Qytaıdyń qazirgi ekono­mı­kalyq ahýaly, qytaı-qazaq qatynastarynyń keleshegi men túrli salalar yntymaqtastyǵy talqylanǵan jıynǵa QHR-dyń Qazaqstandaǵy Tótenshe jáne ókiletti elshisi Chjan Hanhýı, Májilis depýtattary, «Nur Otan» partııasynyń ókilderi jáne birqatar dıplomat, saıasatkerler qatysty.

Al jıynda negizgi sóz sóı­legen qytaı saıasatkeri Sh.Chýnıao jýyrda ǵana ótken Qytaı kommý­nıstik partııasynyń jalpy jı­nalysynda naqtylanǵan máse­lelerdi tanystyryp, eki el ara­syndaǵy saıası-áleýmettik se­rik­testiktiń jaı-kúıin saralady.

«Bizdiń áriptestigimiz ben óz­ara yntymaqtastyǵymyz bas­­qarý júıesindegi sybaılas jem­qorlyqqa qarsy kúres jaǵda­ıyn­da da tereńdep keledi. Bul ret­te tájirıbelik turǵydaǵy baıla­nysymyz nyǵaıýda. Máse­len, 2014-2016 jyldary Qytaı­da 2 565 qashqynda júrgen sheneý­nik tut­qyndalǵan bolsa, ótken jyly túıeni túgimen jut­qan 100 jemqor-qashqynnyń aty-jóni anyq­talyp, onyń 37-siniń qolyna kisen salyndy. Osy­laı­sha, joǵary laýazymdy sheneý­nikter arasyndaǵy sybaılas jemqor­lyqtyń tamyryna balta shabý isinde eki eldiń ózara aqpa­rat almasyp, tájirıbe bólisýi ta­raptarǵa tıimdi bolatyn­dy­ǵyna senimdimin», dedi ol.

Sonymen qatar, shara aıasynda BAQ ókilderiniń saýaldaryna jaýap bergen QHR-dyń Qazaqstandaǵy Tótenshe jáne ókiletti elshisi Chjan Hanhýı ýaqyt ótken saıyn qazaq-qytaı qarym-qatynasy qalyńdaı túsip, baılanystyń joǵary deńgeıi qarqyn alatyndyǵyn atap ótti.

«Ásirese, shaǵyn jáne orta kásipti jandandyrý úshin Qy­taı bankteri atalǵan salany ne­sıelendirýge beıildi. Tek, jer­gilikti atqarýshy bılik qyz­mettiń yńǵaıyn úılestirip berse bolǵany. Mundaı qadam Qazaqstan Prezıdenti naqtylaǵan «Nurly jol» baǵdarlamasynyń tetikterin júzege asyrýda da óz tıimdiligin kórsetedi. Sondaı-aq, batys pen shyǵystyń arasynda dáneker bolyp otyrǵan búgingi Qazaqstannyń strategııalyq jo­balary Qytaı úshin de asa ma­ńyzdy ekendigin eshqashan qaperden shyǵarýǵa bolmaıdy», dedi elshi.

Memleketaralyq yntymaq­tastyqtyń tereńdeı túsýin arqaý etken keleli keńeste eki el ókilderi ınvestısııalyq áleýet jóninde de pikir almasty. Atap aıtqanda, qytaı ınvestorlarynyń aýyl sharýashylyǵy men shıkizat óndirý, óńdeý úderisi, azyq-túlik taýarlaryn shyǵarý salala­ryn qarjylandyrýǵa qyzyǵý­shylyqtary zor.