Aqtóbede ótken «Mereıli otbasy» ulttyq baıqaýyna qatysýshylar sany jyl saıyn ósip keledi. Aıtalyq, bıyl oǵan qatysýǵa 500-den astam ótinish túsken bolsa, is-shara qorytyndysy boıynsha iriktelgen 38 otbasy oblystyq synnyń marapattaý kezeńine qatysty. Ári onyń altaýy oblystyq baıqaýdyń júldegeri atandy. Sonyń ishinde erli-zaıypty Saılaýbek pen Bıbigúl Ábildaevtar oblystyq kezeńniń jeńimpazy atanyp, bas júldege ıe boldy. О́negeli otbasy ıeleri jeti perzent tárbıelep, ósirip keledi. Erli-zaıyptylardyń bir-birine degen mahabbaty men súıispenshiligi jáne ózara syılastyǵy otaǵasy Saılaýbektiń qaterli dertti jeńip, odan aıyǵýyna septigin tıgizgeni bólek bir áńgimeniń enshisi.
Kóp balaly otbasyna tatý-tátti tirlik jáne bereke men birlik kórinisteri tán. Sonyń báriniń uıytqysy men altyn qazyǵy atanǵan «Altyn alqa» ıegeri Bıbigúl Ábildaeva Aqtóbe qalasynda ótken jyly paıdalanýǵa berilgen «Anaǵa taǵzym» ortalyǵynda medıatorlyq qyzmet atqarady. Ol ajyrasqandardy qaıta qosyp júrgen shapaǵaty men meıirimi, júreginiń jylýy mol jan. Sońǵy 8-9 jyldyń aralyǵynda bıik parasat ıesi 400-ge tarta otbasynyń buzylmaı, saqtalyp qalýyna kómegin tıgizgen eken.
«Mereıli otbasy» ulttyq baıqaýynyń oblystyq kezeńiniń jeńimpazy men júldegerlerin marapattaý rásimi kezinde Aqtóbe oblysynyń ákimi Ońdasyn Orazalın óz sózin zańǵar jazýshy, memleket jáne qoǵam qaıratkeri Ábish Kekilbaevtyń «ultymyzǵa ne tileısiz» degen tilshi saýalyna oraı «qazirgi jaǵdaıda ultymyzdyń úsh urpaǵynyń ókiliniń basy bir dastarqanda toǵysýyn qalaımyn» degen ǵıbratty tilegimen túıindedi. AQTО́BE