Jıynnyń saltanatty jabylýyna Qorǵanys mınıstrligi men Qaraǵandy oblysy ákimdiginiń basshylyǵy, Qazaqstan Respýblıkasy Qarýly Kúshteriniń ardagerleri jáne arnaıy shaqyrylǵan qonaqtar qatysty.
Elimizdiń túpkir-túkpirinen 600-den astam jas patrıottar qatysqan jıynnyń qorytyndysynda júldeli oryn ıegerleri anyqtaldy. Respýblıkalyq «Jas ulan» jáne mamandandyrylǵan lıseıler arasyndaǵy synda Semeı qalasynyń «Jas ulan» mektep-ınternatynyń komandasy úzdik shyqty. Ekinshi júldeni astanamyzdaǵy S.Nurmaǵambetov atyndaǵy «Jas ulan» mektep-ınternaty ıelense, úshinshi oryndy Shymkentten kelgen S.Rahymov atyndaǵy «Jas ulan» mektep-ınternaty qanaǵat etti.
Qarýly Kúshterdiń áskerı-patrıottyq klýbtary men basqa da áskerı qurylymdar arasyndaǵy jarysta «Shyǵys» áskerı-patrıottyq klýbyna («Shyǵys» óńirlik qolbasshylyǵy) teń keler qarsylas tabylmady. «Saǵadat» áskerı-patrıottyq klýby (Tyl jáne qarýlaný bastyǵy basqarmasy) ekinshi júldege laıyqty dep tanylsa, áskerı polısııa bas basqarmasynyń «Jas ulan» áskerı-patrıottyq klýby úshinshi orynǵa ıe boldy.
О́ńirlerdegi áskerı-patrıottyq klýbtar arasynda Batys Qazaqstan oblysynan qatysqan «Jiger» komandasy birinshi oryndy jeńip aldy. Shyǵysqazaqstandyq «Jas qyran» klýby ekinshi bolsa, Aqmola oblysynyń «Aıbyn» ujymy úshinshi júldeni mise tutty.
Al Semeıdiń «Jas ulan» áskerı-patrıottyq klýby gran-prı ıegeri atandy.
Jalpykomandalyq jáne jekeleı synda jeńimpazpaz bolǵan, júldeger atanǵan jas patrıottardyń barlyǵyna gramotalar men medaldar, kýboktar men estelik syılyqtar tabys etildi.
Eske salsaq, maýsym aıynyń 17-22 kúnderi aralyǵynda Qaraǵandy oblysyndaǵy «Spassk» oqý ortalyǵynyń polıgonynda «Aıbyn» respýblıkalyq áskerı-patrıottyq jastar jıyny ótken bolatyn. Sharaǵa Qazaqstan Respýblıkasynyń Prezıdenti – Qarýly Kúshterdiń Joǵarǵy Bas Qolbasshysy Qasym-Jomart Toqaev, sondaı-aq, Qorǵanys mınıstri Nurlan Ermekbaev, Parlament depýtattary, Qaraǵandy oblysy ákimdiginiń basshylyǵy, Qarýly Kúshterdiń ardagerleri qatysty.