Bıyl – batyrdyń 100 jyldyǵy. Osy aıtýly mereıtoıdy ulyqtaý maqsatynda týyp-ósken Nurken aýylynda dúbirli dýman ótti.
Alty Alashqa saýyn aıtylǵan toı saltanatty mıtıngpen bastaldy. Batyr jerlesimizdiń keskindi músini men jaýǵa shapqan qanatty tulpar ushaǵy beınelengen eskertkish alańyna elimizdiń ár túkpirinen qalyń el jınaldy. Dúbirli jıynnyń shymyldyǵyn aýdan ákimi Halel Maqsutov ashyp, Qaraǵandy oblysy ákiminiń orynbasary Serik Shaıdarov, qazaqtyń tuńǵysh ǵaryshkeri, Keńes Odaǵynyń Batyry, Halyq Qaharmany Toqtar Áýbákirov, Qaraǵandy oblysynyń prokýrory Marat Seksenbaev, batyrdyń inisi Áýken Ábdirov pen bólesi Saǵadat Dúısebekov, Qazaqstan Respýblıkasynyń Qorǵanys mınıstrligine qarasty Áýe qarýly kúshteriniń bas qolbasshysynyń orynbasary Evgenıı Podgaıskıı, Nurken Ábdirov aýyldyq okrýgi ardagerler keńesiniń tóraǵasy Jeńis Kópjasar bastaǵan qurmetti qonaqtar saltanatty sharada er esiminiń el tarıhynda altyn áriptermen jazylǵanyn aıtyp ótip, batyrdyń jaýyngerlik aıbynyn, erjúrektik pen batyldyqtyń úlgisin kórsetetindigin umytpaý maqsatynda el aǵalary óskeleń urpaqqa ulyqtaý ekendigin atap ótti.
Aldymen batyr eskertkishiniń aldyna alaýlaǵan gúl shoqtaryn qoıyp, bastaryn ıip taǵzym etken qalyń top jaýjúrek bahadúrdi eske alyp, erliginiń eshqashan umytylmaıtyndyǵyn aıtty. Shara barysynda Qaharman batyr Nurken Ábdirovtiń rýhyna qurmet kórsetken Qaraǵandy avıapolkiniń jeke quramy sap túzep, sherý ótkizdi jáne osy áskerı bólimniń pılottary úsh ushaqpen áýe keńistiginde sheberliktiń has úlgisin kórsetip, neshe túrli beıneler jasap, jınalǵan jurtqa tańdaı qaqtyra batyrdyń sońǵy urysynan kórinis usyndy. Qaraqurym halyq jıylyp, aýyldan on shaqyrym jerdegi qyryqtan astam aqshańqan kıiz úıler tigilgen aýylǵa bettedi. Aýyldyń aımaǵy áýelegen ánge, kúmbirlegen kúıge toldy, sahnada batyr jaıynda teatrlandyrylǵan qoıylym qoıyldy. Ulttyq sportty ulyqtaǵan sharada balýan jigitter qyzyl kilemde qabylandaı beldesti, jamby atyldy, qoı men gir tasyn kóterýden saıys ótkizip, alaman men top báıgede kil júırikte kim júırik ekenin anyqtady.
Jaý jaǵadan alǵanda fashıstik zalymdarmen qazaqtyń qaısar jigitteri jerde de, kókte de qaısarlyqpen aıqasty. Jankeshtilik ataǵy kúlli Keńes Odaǵynyń shartarabyna jaıylǵan batyr Nurken Ábdirov bar bolǵany jıyrma úsh jyl ǵumyrynda erlik pen otansúıgishtiktiń sımvolyna aınaldy. Osyndaı bahadúrlerimizdi ulyqtaýǵa atsalysqan atpal azamattar men qalyń qaýym bir-birine rızashylyǵyn bildirip, dúbirli toıdan rýh alyp qaıtty.
Gúlbarshyn Jumahanova,
Qarqaraly aýdany ákiminiń baspasóz hatshysy
Qaraǵandy oblysy,
Qarqaraly aýdany