Qaraǵandy oblysyndaǵy Nura aýdanynyń Qaınar aýylynda jańa órt sóndirý beketi ashyldy. Mundaǵy órt sóndirýshiler atalǵan aýyl men jaqyn mańdaǵy eldi mekenderge qyzmet kórsetetin bolady. Qazirgi tańda Qaınar aýylynda barlyǵy 204 tútin bar, onda 1164 adam meken etedi.
Buǵan deıin mundaı beketter Shet, Jańaarqa, Buqar jyraý, Osakarov, Nura, Abaı, Qarqaraly jáne Ulytaý aýdandarynda ashylǵan-dy. Olar jalpy sany 23 myń adamnan asatyn 28 eldi mekenniń órt qaýipsizdigin saqtaıdy.
Jalpy, órt sóndirý beketteri jergilikti atqarýshy organdardyń qoldaýymen ashylady. Al Qaraǵandy oblystyq tótenshe jaǵdaılar departamenti olardy qajetti tehnıkamen qamtamasyz etedi. Sońǵy ýaqyttyń ózinde atalǵan beketterge alty órt sóndirý avtotehnıkasy berilgen.
Qazirgi ýaqytta Jańaarqa jáne Qarqaraly aýdandary ákimdikteriniń balansyna órt sóndirý kóliginiń taǵy ekeýin berý máselesi qarastyrylýda. Jyl sońyna deıin Shet, Osakarov, Nura, Abaı jáne Ulytaý aýdandarynda da bes órt sóndirý beketin ashý josparda bar.
Aıta ketý kerek, Qaınar aýylynda ashylǵan bul nysan óńirdegi 14-shi órt sóndirý beketi.
Qaraǵandy oblysy,
Nura aýdany