Grekııada Dúnıejúzilik kitaphanalyq jáne aqparattyq kongres ótip jatyr. Osy shara barysynda Almatydaǵy Ulttyq kitaphana dırektory, Qazaqstandyq kitaphanalyq odaqtyń tóraıymy Baqytjamal Ospanova IFLA Bas hatshysy Djerald Lıaıtner jáne Kitaphanalyq qaýymdastyqtar men mekemelerdiń halyqaralyq federasııasy (IFLA) prezıdenti Glorııa Peres-Salmeronmen kezdesti.
Ejelgi órkenıet ortalyqtarynyń biri Afınada «Kitaphanalar: ózgeristerge arnalǵan dıalog» dúnıejúzilik kitaphanalyq jáne aqparattyq kongress álemdik kitaphana qaýymdastyǵy úshin mańyzdy oqıǵa. Kongreske jyl saıyn 140-qa jýyq kitaphana jáne aqparattyq ǵylym salasyndaǵy ártúrli deńgeıdegi 3500-den astam maman qatysady. Kitaphanalyq qaýymdastyqtar men mekemelerdiń halyqaralyq federasııasynyń (IFLA) prezıdenti Glorııa Peres-Salmeronnyń aıtýynsha, kitaphanalar qoǵamdaǵy ózgeristerdiń qozǵaýshylary, al Dúnıejúzilik kitaphanalyq jáne aqparattyq konferensııa biz úshin jyl saıyn baǵytymyzdy jańasha aıqyndaýǵa jaqsy múmkindik.
Halyqaralyq deńgeıdegi aýqymdy shara aıasynda Abaı Qunanbaıulyn álemdik órkenıet aýqymynda tanystyrý maqsatynda «Uly dalanyń uly aqyny – Abaı» atty ádebı kesh uıymdastyryldy. Sondaı-aq «Aral aımaǵynyń ekologııalyq ortasyn qaıta jańǵyrtý jónindegi kitaphanalyq eriktiler qyzmeti» týraly Ulttyq kitaphanasy mamandary men erikti qazaqstandyq kitaphanashylar birge daıyndaǵan kórneki (stendtik) baıandama aǵylshyn tilinde Dúnıejúzi kitaphanashylary nazaryna usynyldy. Bul sharaǵa Ulttyq kitaphananyń Qordy qabyldap alý, baqylaý jáne tolyqtyrý qyzmetiniń jetekshisi Q.Izambekova, Anyqtamalyq-aqparattyq qyzmet kórsetý qyzmetiniń jetekshisi – A.Rahımova jáne basqa da qyzmetkerler qatysýda.
Álemniń túpkir-túpkirinen kelgen kitaphanashylar ozyq tájirbıeler men ıdeıalar almasyp, meılinshe joǵary sapaly qyzmet kórsetý joldaryn anyqtap, kitaphanalardyń aldynda turǵan ózekti máselelerdi talqylaıdy jáne sol arqyly qoǵamǵa sony serpin qosady. Sonymen qatar aımaqtyq jáne halyqaralyq deńgeıdegi kitaphana isin jańǵyrtý, aqparattyq jáne ınnovasııalyq basqarý salasyndaǵy ozyq tájirbıelerdi kórsetý, bólisý men zertteýge múmkindik jasaý, zaman talabyna saı jańasha oılaýdy qalyptastyrý jáne kitaphananyń jańa bet-kelbetin qalyptastyrý máselesi de qozǵalmaq. Sondaı-aq, kongress álem kitaphanashylaryna 85-shi Dúnıejúzilik kitaphanalyq jáne aqparattyq konferensııanyń strategııasyn birlese júzege asyrý jáne biryńǵaı kitaphana alańyn qurý múmkindikterin beredi. Bilim áleminde kitaphana – ıdeıalardy generasııalaý alańyna aınalýy tıis.
ALMATY