Nur-Sultanda ótken «Úlken Eýrazııa: Dıalog. Senim. Áriptestik» taqyrybyndaǵy Eýrazııa elderi parlamentteri spıkerleriniń 4-keńesinen keıin arnaıy baspasóz máslıhaty uıymdastyryldy. Bul týraly Májilistiń baspasóz qyzmeti habarlady.
Oǵan Májilis Tóraǵasy Nurlan Nyǵmatýlın, Reseı Federasııasy Federaldyq Jınalysy Memlekettik Dýmasynyń Tóraǵasy Vladımır Volodın, Koreıa Respýblıkasy Ulttyq Assambleıasynyń Tóraǵasy Mýn Hı San jáne 5-keńesti ótkizetin Indonezııa Parlamenti О́kilder Palatasynyń vıse-spıkeri Fadlı Zon qatysty.
Aqparat quraldary ókilderiniń aldynda sóz alǵan Májilis Spıkeri 4-keńes - Eýropa jáne Azııanyń 60-tan astam elderiniń basyn qosqan eń iri ári eń bedeldi parlamenttik forýmǵa aınalǵanyn aıtty.
Forýmda talqylanǵan taqyryptar aýqymy óte keń boldy. Onyń ishinde, aımaqta beıbitshilik pen turaqtylyqty nyǵaıtý, terrorızm men ekstremızmge qarsy is-qımyl, órkenıet pen mádenıet dıalogyn kúsheıtý, parlamentaralyq yntymaqtastyq, ınnovasııalyq ekonomıkany damytý, sıfrlandyrý, áleýmettik máselelerdiń sheshimi qamtyldy. Eýrazııa keńistiginde tabysty yntymaqtastyqty keńeıtý jáne nyǵaıtý úshin kóptegen naqty usynystar men tájirıbelik usynymdar aıtyldy,- dedi Májilis Spıkeri.
Odan keıin sóz alǵan Reseı Federasııasy Federaldyq Jınalysy Memlekettik Dýmasynyń Tóraǵasy Vladımır Volodın, Koreıa Respýblıkasy Ulttyq Assambleıasynyń Tóraǵasy Mýn Hı San forýmnyń parlamentaralyq baılanystardy, jalpy alǵanda, eýrazııalyq yntymaqtastyqty odan ári nyǵaıtý maqsatyn alǵa qoıa otyryp, jan-jaqty, óte joǵary deńgeıde ótkenine rızashylyq bildirdi. Al Indonezııa ókili Fadlı Zon keler jyly óz elderinde qazaqstandyq Parlamenttiń jolymen tabysty ótkizý úshin bar kúsh-jigerin arnaıtynyn aıtty.
Nurlan Nyǵmatýlın barlyq forýmǵa qatysýshylarǵa, aqparat quraldary ókilderine óz alǵysyn jetkizdi.