Almatyda ótip jatqan jasóspirimder arasyndaǵy álem birinshiliginiń ekinshi jarys kúni Qazaqstan quramasynyń qorjynyna taǵy qos qola medal tústi. Bul júldelerdiń ıegerleri – Marlen Ádil men Tilegen Tynarbaı.
60 kılo salmaq dárejesinde qos qandasymyz synǵa túsken edi. Olar – Marlen Ádil men Nursultan Zaızaǵalıev. Tórt birdeı qarsylasyn qapy qaldyrǵan bizdiń jas órender qola medal úshin ózara talasty. Bul tartysta Nursultan vazarı ádisimen alda kele jatqan edi. Alaıda úsh eskertý alǵandyqtan báseke merziminen buryn toqtalyp, jeńis Marlenniń enshisine jazyldy.
66 kılo salmaqtaǵy Tilegen Tynarbaı alǵashqy aınalymdarda Tájikstan men Chernogorııa ókilderin utqanymen, úshinshi kezeńde brazılııalyq balýanǵa ese jiberdi. Odan keıin Úndistan men Grekııa dzıýdoshylaryna san soqtyryp, úshinshi tuǵyrǵa taban tiredi.