Qońyraý úsh márte soǵylyp,
Shymyldyq syrǵanaı túrildi.
Qop-qoıý bir muńǵa kómilip,
Umytyp taǵdyrdy, ǵumyrdy,
Kómeıden kúp-kúreń sher tógip,
Jumbaqtaý álemnen dert emip,
Kóbelek syqyldy órtenip,
Jan daýysyn sozady ol
jer teýip:
«Bolsaq pa, bordaı bop tozsaq pa?!
Eńseni ezedi ajyrǵy!
Qasaryp, qaıtadan jazsaq pa
Mańdaıǵa qashalǵan jazýdy?!
Arasy kebin men qundaqtyń
О́mir me – sozylǵan súzek bul!
Sheshimin máńgilik jumbaqtyń
Shertedi qanjardyń júzi ótkir…
Qudireti sýyrar kórden de
Qaıda álgi Qudaı men ádilet?!»
Naızadaı janaryn óńmenge
Tik qadap suraıdy Gamlet.
…Dúr etip, dúrlikken qoshemet…
Joq endi ol álem…Gamlet…
Kózinde jarq etip, óshedi ot…
Laǵnet! Laǵnet! Laǵnet!
Bilmeıdi-aý turǵan el qol soǵyp
Osy bir ártistiń taǵdyryn.
Ýaqyt – aınalǵan kón sharyq
Kemirip jatqanyn ár kúnin…
Sahnadan tys onda joq-ty ómir…
Jalǵyzdyq…túńilý…syńarsý…
Oǵan jat dúnıe, kók temir
Oǵan jat dý-dýman, ular shý.
Syrlasyp perishte, martýmen
Qý janyn azaptap tán túrme,
Ol ózin izdeıtin árkimnen,
Ol ózin telıtin árkimge…
Qoıylym tarqaǵan kezinde
Jýylmaı betiniń grımi,
Shylymy shoqtanyp ezýde
Betke alyp ketetin bir úıdi.
Tuńǵıyq bir álem bir ózi,
Tuıyqtaý, týrashyl hám qyzba.
Qoǵamǵa osyndaı minezi
Jaqpaıtyn bolǵan soń
jalǵyz da…
Meńgermeı qalatyn óz basyn
Qylyqtyń kóp tartty kesirin-
Avtorǵa janynan sóz qosyp,
Tyńdamaı rejısser sheshimin.
Qajytyp turlaýsyz tirligi,
О́zekke ókinish shoq túsip,
О́rtenip júrdi de bir kúni
Shydamaı sherlenip ketti iship…
Ketti iship eń názik sezimin
Jeline jazmyshtyń ushyryp.
Ketti iship aqyry óziniń
Eshkim de emesin túsinip…
Bilmedi…bilmedi sol kisi
Bir basqa tapqanyn eki ólim…
Bilmedi Qudaıdyń bolmysy
Ári – joq, ári – bar ekenin…
Baýyrjan IGILIK