Germanııa astanasy Berlın qalasynda 7 qazanda mańyzdy halyqaralyq is-shara ótti. Negizgi memlekettik organdar men kvazımemlekettik kompanııalardyń ókilderinen turatyn qazaqstandyq delegasııany Premer-Mınıstrdiń orynbasary Roman Sklıar bastap bardy. Bul týraly Premer-Mınıstrdiń baspasóz qyzmeti habarlady.
Forýmǵa eki eldiń iskerlik ortalarynyń 200-den astam ókilderi qatysty. Forým sheńberinde ınvestısııalyq jáne saýda-ekonomıkalyq salalarynyń perspektıvti jobalary qaraldy, nemis kompanııalarymen jalpy somasy shamamen $700 mln-ǵa ınvestısııalyq jobalardy iske asyrý týraly ýaǵdalastyqqa qol jetkizildi. Budan ózge, LindeGas, SMS Group, CLAAS Group sııaqty jáne taǵy basqa kompanııalarmen yntymaqtastyq perspektıvalary talqylandy.
Sóz sóıleý barysynda Roman Sklıar osy bıznes forým saýda-ekonomıkalyq jáne ınvestısııalyq yntymaqtastyqty belsendendirý, logıstıka sııaqty ózekti salalarda seriktestiktiń damýyna serpin berý, sondaı-aq ekijaqty ózara is-qımyldyń jańa múmkindikterin ashý úshin jaqsy alań bolǵanyn atap ótti.
Qazaqstan Respýblıkasynyń Úkimeti basshysynyń orynbasary atap ótkendeı, Germanııa uzaq jyldar boıy Qazaqstannyń strategııalyq seriktesi men senimdi dosy bolyp keledi, dıplomatııalyq qatynastar ornatylǵan 27 jyl ishinde elderimiz arasynda yntymaqtastyqtyń irgesi myqty arhıtektýrasy quryldy.
Budan ózge, kóp jyldar boıy Germanııa Qazaqstannyń jetekshi syrtqy ekonomıkalyq seriktesteriniń biri. Mysalǵa, 2018 jyldyń qorytyndysy boıynsha taýar aınalymy tarıhı maksımým 5,1 mlrd eýroǵa jetti, bul Germanııanyń Ortalyq Azııanyń barlyq elderimen syrtqy saýdasynyń shamamen 85%-yn quraıdy. Bul rette, sońǵy 14 jylda nemis kompanııalary Qazaqstanǵa shamamen $5 mlrd ınvestısııalady.
Qazaqstan-German qatynastarynyń mańyzdy kezeńderiniń biri, bul Qazaqstan men Germanııanyń saıası, ekonomıkalyq jáne sarapshylyq ortalarynyń ókilderi úshin formaldy emes alań retinde Saýda-ekonomıkalyq yntymaqtastyq jónindegi úkimetaralyq jumys toby (ÚAJT), Strategııalyq yntymaqtastyq jónindegi Qazaqstan-German Iskerlik keńesi, sondaı-aq Berlın Eýrazııalyq Klýby sııaqty qurylymdardyń ashylýy men belsendi jumysy.
Sózin qorytyndylaı kele Roman Sklıar nemis bıznesi úshin bizdiń el Ortalyq Azııadaǵy senimdi seriktes ekenin atap ótti. Búgin Qazaqstan bıznes júrgizý úshin eń qolaıly sharttar usynady, sebebi bıznesmenderdiń barlyq bastamalary memleket pen Úkimettiń tarapynan únemi qoldaý tabady.