Eýropalyq odaqtyń 16 elinen usynylǵan kıno týyndylarynyń arasynda ár túrli janrdaǵy «Sezar», «Davıd dı Danatello», «Hrýstalnyı medved» sııaqty halyqaralyq marapattardyń júldegerleri bar, dep habarlady Almaty ákimdiginiń baspasóz qyzmeti.
Kınofestıvaldiń maqsaty – basqa eldermen yntymaqtastyqty nyǵaıtý, jańa baılanys ornatý, pikir almasý arqyly elimizdiń kınemotografııasyn halyqaralyq standarttarǵa saı deńgeıge jetkizý. Úsh kúnge sozylǵan festıvaldiń kınokórsetilimderi Mega park-te ornalasqan «Chaplin» kınoteartynda ótip jatyr. Kórermender «Úmit keseli», «Dıamantıno», «Reı jáne Lız», «Shek», «Qysqy shybyndar» fılmderin tamashalaýǵa múmkindik aldy. Bul shara elimizde osymen tórtinshi ret ótkizilip otyr.
«2019 jyldyń Eýropa kınofestıvali sheńberinde Eýropa elderiniń 16 elinen 16 fılm usynylyp otyr. Bıylǵy jyldyń ereksheligi tek qana fılmderdiń kórsetilimderi ǵana emes, sonymen qatar Eýropadan tikeleı fılmderdiń avtorlary, birneshe rejısserlerdi shaqyryp, atalǵan kisilerdiń jas kınematografıster, stýdentter jáne barlyq qyzyǵýshylyq tanytatyn adamdarǵa kınony shyǵarý úrdisi, dokýmentalıstıkadaǵy jańa ádistemeleri sııaqty suraqtar boıynsha master-klasstar ótkizedi», dedi Qazaqstandaǵy Eýropalyq odaq ókildiginiń baspasóz hatshysy Elnar Baınazarova.
Qazaqstandaǵy kınofestıvalge Renars Vımba álemniń 60-tan astam elinde kórsetilip, 40-tan asa nomınasııaǵa ıe bolǵan «Mellow mud», qazaqshada «Men osyndamyn» dep atalatyn týyndysyn alyp kelgen.
«Sıýjet jaǵynan qarastyrsaq, bul – eresek ómirge endi ǵana qadam basqan jasóspirim qyz, onyń eseıýi, ómirge degen qarym-qatynasy týraly kıno. Al eger tereńirek qarastyrsaq, bul ol qyz týraly ǵana emes, jalpy ata-ananyń balalaryn tastap ketýi máselesin qozǵaıdy. Egerde ata-ana balalarǵa kóńil bólip, qaraı almaǵan jaǵdaıda bala sol ata-ananyń rólin ózine alady. О́zi ata-ana bolýǵa májbúr bolady»,deıdi latvııalyq rejısser Renars Vımba