Elordada «WorldSkills Kazakhstan 2019» - V Respýblıkalyq kásibı sheberlik Chempıonatynyń ashylý rásimi ótti.
Chempıonattyń konkýrstyq bóligi 12-14 qarasha aralyǵynda Nur-Sultan qalasyndaǵy Táýelsizdik saraıynda ótedi. Oǵan elimizdiń 17 aımaǵynan 22 jasqa deıingi 400-den astam maman kelgen. Qatysýshylar WorldSkills-tiń 38 quzyrettiligi (mamandyqtary) boıynsha saıysqa túsedi jáne tańdalǵan quzyrettilikte medal utyp alý múmkindigi úshin jarysady. Konkýrsqa qatysýshylardy 500-ge jýyq sarapshy baǵalaıdy. «WorldSkills Kazakhstan 2019» - V Respýblıkalyq kásibı sheberlik Chempıonaty jas kadrlardy ekonomıkanyń óndiristik sektoryna tartýǵa jáne eldegi tehnıkalyq jáne kásiptik bilim berýdi damytýǵa yqpal etedi.
Sharanyń ashylý saltanatynda Bilim jáne ǵylym mınıstri Ashat Aımaǵambetov baıqaý qatysýshylaryna sáttilik tilep, atalǵan chempıonattyń elimizdiń ekonomıkasy úshin mańyzy zor ekendigin atap ótti.
«Bul - shyn máninde elimiz úshin, respýblıkamyz úshin óte mańyzdy is-shara. Elimizdiń basshysy Qasym-Jomart Kemeluly Toqaev bilim salasyna óte úlken kóńil bóledi. Búgin Memleket basshysynyń qabyldaýynda boldym. Tehnıkalyq jáne kásiptik bilim salasyn damytý boıynsha naqty tapsyrmalar berdi. Sonyń ishinde WorldSkills qozǵalysyn damytý máselesin de kóterdi. WorldSkills quzyrettilikterin bilim baǵdarlamalaryna engizý máselesi - bizdiń aldymyzda turǵan basty maqsat. Biz ony damytatyn bolamyz», dedi Ashat Qanatuly.
Taǵy bir aıta keterlik jaıt, WorldSkills-tiń ekonomıkamyzǵa mańyzdylyǵyn eskere otyryp, elimizdiń Premer-Mınıstri Asqar Mamın osy qozǵalysty basqarý týraly sheshim qabyldady.