Qazaqstan Respýblıkasy Syrtqy ister mınıstrliginde «Qazaqstan Respýblıkasy - Eýropalyq Odaq» parlamenttik yntymaqtastyq komıtetiniń 17-shi otyrysyna qatysý úshin elimizge kelgen Eýropalyq Parlamenttiń resmı delegasııasymen kezdesý ótti. Bul týraly Syrtqy ister mınıstrliginiń baspasóz qyzmeti habarlady.
Eýropalyq Parlament delegasııasynyń quramyna Bolgarııa, Germanııa, Italııa, Latvııa, Lıtva, Majarstan, Polsha jáne Fransııa depýtattary kirdi.
Kelissózderdiń negizgi taqyryby Qazaqstan men EO arasyndaǵy Keńeıtilgen áriptestik pen yntymaqtastyq týraly kelisimniń (KÁYK) tolyq kúshine enýi qarsańynda yntymaqtastyqtyń saıası jáne saýda-ekonomıkalyq perspektıvalaryn talqylaý boldy. Bul rette, Ortalyq Azııa boıynsha Eýropalyq Odaqtyń jańa Strategııasy sheńberinde praktıkalyq ózara is-qımylǵa jáne Eýropa men Azııanyń ózara baılanysyna erekshe nazar aýdaryldy.
Qazaqstan dıplomattary eýropalyq saıasatkerlerdi KÁYK sheńberinde ekijaqty áriptestikti jandandyrýǵa, sondaı-aq Eýropa elderimen iskerlik jáne mádenı-gýmanıtarlyq almasýlardy arttyrý maqsatynda QR azamattary úshin vızalyq rejımdi jeńildetý boıynsha QR men EO arasyndaǵy kelissózder prosesin jyldam iske qosýǵa shaqyrdy.
О́z kezeginde EP delegasııasynyń basshysy F. Martýshello 2020 jylǵy 20 qańtarda Brıýsselde ótken QR-EO yntymaqtastyq keńesiniń 17-shi otyrysynyń qorytyndylary boıynsha EO ınstıtýttarymen QR Prezıdenti K. Toqaevtyń demokratııalyq jáne áleýmettik-ekonomıkalyq reformalaryn qoldaý týraly taraptardyń qol jetkizgen ýaǵdalastyqtaryna joǵary baǵa berdi.