Memleket basshysy Qasym-Jomart Toqaev Halyqaralyq «Alash» ádebı syılyǵynyń ıegeri, aqyn, synshy Amanhan Álimniń otbasyna kóńil aıtý jedelhatyn joldady. Bul týraly Prezıdenttiń baspasóz hatshysy Berik Ýálı Facebook paraqshasynda jazdy.
«Aqyn, synshy, ádebıetshi, pýblısıst Amanhan Álimniń qaıtys bolýyna baılanysty onyń otbasy men týǵan-týystaryna qaıǵylaryna ortaqtasyp kóńil aıtamyn. Amanhan Álimuly qazaq ádebıetiniń kórnekti ókilderiniń biri edi. Sonymen qatar ol otandyq jýrnalıstıkanyń damýyna da ólsheýsiz úles qosty. Qatardaǵy tilshiden bas redaktorlyqqa deıingi joldyń bárinen ótti. Ol ulttyń ósýine, ádebıettiń damýyna kedergi bolatyn keri áreketterdiń barlyǵyn syn sadaǵyna ildi. Amanhan Álim qazaq rýhanııatynyń kókjıegin keńeıtý úshin aqıqattan aınymaǵan qaıratker qalamger edi. Marqumnyń jatqan jeri jaıly, ımany salamat bolsyn! Qazaqstan Respýblıkasynyń Prezıdenti Qasym-Jomart Toqaev» dep jazdy Berik Ýálı.