DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń ujymy «Abdı Ibrahım Global Farm «JShS-niń bas dırektory Zııathan Ahmeduly Gasanovtyń mezgilsiz qaıtys bolýyna baılanysty týǵan-týystary men jaqyndaryna qaıǵyryp kóńil aıtady. Bul týraly memlekettik komıssııanyń shuǵyl shtabynyń Telegram paraqshasynda jarııalandy.
«Ol alǵashqylardyń biri bolyp medısına qyzmetkerleri men qazaqstandyqtarǵa koronavırýs ınfeksııasymen kúreste kómektesip, ókinishke oraı, osy indettiń kesirinen kóz jumdy.Zııathan Ahmeduly óz isiniń sheberi boldy, ol elimizdiń farmasevtıka salasynyń damýyna zor úlesin qosty. Oǵan qosa, óziniń syrqattanyp júrgenine qaramastan, jalpyǵa birdeı tóngen qaýipke beı-jaı qaramaı, elimizge COVID-19 vırýsymen kúreste ólsheýsiz kómegin tıgizdi. Taýarlar men kórsetiletin qyzmetterdiń sapasy men qaýipsizdigin baqylaý komıtetiniń aýmaqtyq departamentteriniń medısına qyzmetkerlerine jeke qorǵanysh quraldaryn tegin berdi.Jany jaısań azamat, áke, ul, tamasha basshynyń ómirden ozýyna baılanysty qaıǵyryp kóńil aıtamyz. Zııathan Ahmedulynyń otbasymen jáne ózi qurǵan kásiporyn ujymymen orny tolmas qaıǵyǵa ortaqtasa otyryp, kóńil aıtamyz. Biz Qazaqstannyń laıyqty azamaty týraly jaqsy estelikterdi júregimizde saqtaımyz», - delingen habarlamada.