«QazMunaıGaz» UK AQ (budan ári – QMG) Jurtshylyqpen baılanys departamenti elimizdiń iri qalalarynda karantınniń engizilýine jáne munaı ónimderin tutynýdyń azaıýyna baılanysty otandyq munaı óńdeý zaýyttary teńdestirilgen eń tómen qýatpen jumys istep jatqanyn habarlady.
Qazaqstanda munaı óńdeýdi tórt kásiporyn júzege asyrady: «Atyraý munaı óńdeý zaýyty» JShS, «Pavlodar munaı-hımııa zaýyty» JShS, «PetroQazaqstan Oıl Prodakts» JShS (Shymkent MО́Z-i), sondaı-aq «CASPI BITUM» BK» JShS bıtým zaýyty.
2020 jylǵy sáýir aıynda munaı ónimderiniń negizgi túrlerine suranys aıtarlyqtaı tómendedi: avtobenzın men dızel otynyna – 40%-ǵa, al avıasııalyq otynǵa – 70%-ǵa. Bul munaı óńdeý zaýyttaryna munaı jetkizýshilerinen kelip túsetin ótinimder dınamıkasyna jasalǵan taldaýdyń nátıjesimen rastalyp otyr.
Qoımalarda munaı ónimderiniń shamadan tys jınalyp qalýyn boldyrmaý úshin Atyraý, Pavlodar jáne Shymkent MО́Z-derinde munaı óńdeý men munaı ónimderin shyǵarý kólemderi eń tómen deńgeıge deıin azaıtyldy. Zaýyttar óz qyzmetin jalǵastyrýda. Saqtyq sharalary kúsheıtildi. Koronavırýstyq ınfeksııanyń (COVID-19) pandemııasyna baılanysty naýryzdyń 15-nen bastap zaýyttarda barlyq jaǵdaıdy basqaratyn shtabtar jumys isteýde. Olar óz qyzmetin ulttyq kompanııanyń ortalyq shtabymen kún saıyn úılestirip otyrady.
Indettiń aldyn alý boıynsha arnaıy sharalar qabyldandy: ákimshilik jáne óndiristik nysandarda sanıtarlyq-dezınfeksııalyq jáne baqylaý-ótkizý tártipteri kúsheıtildi; kásiporyndarda ákimshilik qyzmetkerlerdiń 70%-y qashyqtyqtan jumys jasaý tásiline kóshirildi; zaýyt qyzmetkerlerine qurylymdyq bólimsheler arasynda júrip-turýǵa shekteý qoıyldy; qyzmetkerlerdiń densaýlyǵyn qadaǵalaý boıynsha kúndelikti monıtorıng júrgiziledi; úı-jaılar men ǵımarattarda, kólik quraldaryna jáne zaýyttarǵa tıesili aımaqtarda tazalyq jumystary únemi júrgizilip turady.
«QazMunaıGaz» zaýyttardy keminde 2 aıǵa jetetindeı mólsherde sýmen, azyq- túlikpen, birinshi kezektegi asa qajet taýarlarmen, jeke qorǵanys quraldarymen qamtamasyz etýde. Barlyq jumysshylarǵa jeke qorǵanys quraldary – medısınalyq maska, nıtrıl qolǵaptary, bakterııaǵa qarsy quraldar taratyldy.