«Biz birgemiz!» aksııasynyń birinshi tolqyny aıaqtaldy dep habarlaıdy Nur-Sultan qalasy ákimdiginiń resmı saıty.
Naýryz aıynyń aıaǵynda Elbasy tapsyrmasy boıynsha bastalǵan «Biz birgemiz!» aksııasynyń alǵashqy nátıjeleri shyǵaryldy. Nur-Sultan qalasyndaǵy «Nur Otan» partııasy fılıalynyń birinshi orynbasary Erlan Kanalımovtyń málimdeýinshe, qazirgi ýaqytta azyq túlik jıyntyqtarymen 7672 otbasy qamtylǵan. Jalpy alǵanda 11 myń otbasyna 165 mıllıon teńgeniń, árqaısysy 15 myń teńgeni quraıtyn azyq túlik sebeti beriledi.
«Áleýmettik qamsyzdandyrý basqarmasy jáne elorda aýdandarynyń ákimdikterimen kelisilgennen keıin muqtajdardyń tizimi únemi jańartylyp otyrady. 19 naýryzdan bastap búginge deıin partııanyń qalalyq fılıalynyń Qoǵamdyq qabyldaý bólmesine 2800-den astam ótinish kelip tústi. Olardyń 80%-y oń sheshimin tapty», - dedi E.Kanalımov.
«Nur Otan» partııasynyń elordalyq fılıalynyń qyzmetkerleri karantın jarııalanǵanyna qaramastan, halyqtyń áleýmettik osal toptaryna azyq-túlik, gıgıena quraldary, sondaı-aq qorǵaý quraldaryn rettep, tasymaldaýdy jalǵastyrýda. Osy úderiske jumyldyrylǵan barlyq adamdar arnaıy qorǵanys kıimderimen qamtylǵan. Jetkizý baılanyssyz, ıaǵnı kómek alýshylardyń páterleriniń esigine deıin júrgiziledi. Kómekti qalyptastyrý jumystary tańerteń erte bastalyp, keshke deıin jalǵasady.
«О́tken aptada biz elordanyń muqtaj turǵyndaryna 2 mıllıon bir rettik medısınalyq maska taratýǵa kiristik. Búginge deıin 15 myńnan astam otbasy qamtyldy. Bul ár otbasyna 50 betperdeden, 750 myńnan astam maska», – dep túsindirdi E.Kanalımov.
Sonymen qatar, ótken aptada medısına mekemelerine, qarttar úıine, balalar úıine, áleýmettik qorǵaý basqarmasynyń bólimshelerine, polısııa qyzmetkerlerine, sondaı-aq blokposttarǵa jalpy somasy 25 mln.teńgege otandyq óndiristiń 16 myńnan astam antıseptık qutylary taratyldy.
«200-den astam jalǵyz basty zeınetkerler men qarttardy elorda meıramhanalarynda daıyndalatyn ystyq tamaqpen qamtýdy belsendi túrde jalǵastyramyz», – dep atap ótti Nur-Sultan qalasyndaǵy «Nur Otan» partııasy fılıaly tóraǵasynyń birinshi orynbasary.
QR Tuńǵysh Prezıdenti – Elbasynyń tapsyrmasy boıynsha qurylǵan «Biz birgemiz!» qory búgingi tańda jalpy somasy 723 mln.900 myń teńgege 14 478 adamǵa qarjylaı kómek kórsetti. Olar 7 sanat boıynsha 50 myń teńgeden aldy. Olardyń ishinde áleýmettik pedagogterdiń derekteri boıynsha AÁK almaıtyn az qamtylǵan jáne kóp balaly otbasylar (1885 adam), AÁK almaıtyn birinshi toptaǵy múgedekter (1895 adam), múgedek balany kútýdi júzege asyratyn tulǵalar (AÁK almaıtyn) (5288 adam), eń tómengi jáne odan tómen zeınetaqy alatyn zeınetkerler (79 adam), jetim balalar (510 adam), UOS qatysýshylary men múgedekteri jáne olarǵa teńestirilgender (2181 adam), sondaı-aq tyl eńbekkerleri (2640 adam).
«Mamyr aıynyń basynda bastalatyn, aksııanyń ekinshi tolqyn aıasynda 28073 otbasy kómek alady. Onyń ishinde barlyq AÁK alýshylar, 2 toptaǵy múgedekter jáne basqalar qamtylady. Jalpy, aksııa aıasynda elordada 53 myńnan astam otbasy qamtylǵan», – dep qorytyndylady E.Kanalımov.