Búgin KSRO men Qazaqstannyń dańqty basketbolshysy, 1988 jyly Seýlde Olımpıadanyń qola júldegeri jáne 1992 jyly Barselonada Olımpıada chempıony atanǵan Irına Gerlıs 54 jasqa tolyp otyr.
Irına 1966 jyldyń 29 sáýirinde Pavlodar oblysynyń Aqtoǵaı aýdanynda dúnıege keldi. Mektep kezinen basketbolmen aınalysyp, túrli jarystarda júlde alyp júrdi. Boıy 190 santımetrden asatyn boıjetken qyraǵy mamandardyń nazarynan tys qalmady. Almatynyń «Ýnıversıtet» klýby sapynda oınaǵan jyldary KSRO quramasy sapyna qabyldady. Gerlıs eki birdeı Olımpııa oıyndarynda júlde alǵany jaıynda biz joǵaryda aıttyq. Odan bólek, jerlesimiz 1986 jylǵy álem chempıonatynda kúmis medaldi moınyna ilse, 1987 jáne 1989 jyldary Eýropa chempıony atandy.
Biraz jyldan beri Irına Gerlıs Fransııanyń Bordo qalasynda turyp jatyr. Onyń kúıeýi de kezindegi tanymal sportshy. Sekseninshi jáne toqsanynshy jyldary voleıbolshy Vıktor Kozık Almatynyń «Dorojnık» jáne «Azamat» klýbtarynyń namysyn qorǵady.