Bıyl Shet aýdanyna «Eńbek» nátıjeli jumyspen qamtý jáne jappaı kásipkerlikti damytýdyń» memlekettik baǵdarlamasy aıasyndaǵy 2020 jylǵa arnalǵan jol kartasy boıynsha jalpy somasy 990,8 mln teńge bolatyn 28 jobany júzege asyrý josparlanǵan. Áleýmettik jáne kólik ınfraqurylymy boıynsha aýqymdy jumystarǵa bólingen qarjy qomaqty, tek iske eki bilekti sybana kirisip, jospardy oıdaǵydaı júzege asyrý ǵana qalǵan.
Karantındik shekteýlerdiń saldarynan týyndaǵan kedergilerge qaramastan, búginde aýdanda bul jumystar jedel túrde bastalyp ta ketti. Mysaly, qazir aýdan ortalyǵy Aqsý-Aıýly kentindegi eki qabatty kóppáterli turǵyn úıdiń shatyryn jańalaý jáne syrtyn qaptaý jumystary qyzý júrgizilýde. Atalǵan nysanǵa aýdandyq jumyspen qamtý ortalyǵy arqyly jergilikti turǵyndar da jumysqa tartylǵan.
Sondaı-aq aýdandaǵy iri eldi meken – Aqadyr kentinde birneshe kóshe boıymen jaıaý júrginshiler joly salyna bastady. S.Seıfýllın kentindegi basty kóshelerdiń jolyna asfalt tóseý jumystary da qarqyndy júrgizilip jatyr.
Taıaýda Shet aýdanynyń halyqty jumyspen qamtý ortalyǵy «Mobıldi jyljymaly jumysqa ornalastyrý rekýrtti pýnkti» tobyn uıymdastyrǵan bolatyn. Búginde atalǵan joba qyzmetkerleri aýdan boıynsha eldi mekenderdi aralap, turǵyndarǵa «Jumyspen qamtý 2020 jol kartasy» baǵdarlamasy aıasynda beriletin múmkindikter jaıly anyqtamalar berý isimen aınalysa bastady. Júrgizilgen jumystar nátıjesinde, atalǵan baǵdarlama boıynsha aýdannyń jumyssyz júrgen 20 turǵyny tirkeýge alyndy. Olardyń ishinde Aqadyr kentiniń jeti, Ortaý aýylynyń jeti jáne Kóktińkóli eldi mekeniniń jeti turǵyny jumysqa ornalastyryldy. Mobıldi top jaqyn aralyqta aýdanǵa qarasty barlyq eldi mekenderge issaparmen shyǵýdy josparlap otyr.
Sonymen qatar, Shet aýdanynda «Aýyl – El besigi» arnaıy jobasy aıasynda 2020 jylǵa arnalyp segiz jobaǵa jalpy somasy 686 mln 331 myń teńgeni quraıtyn qarjy bólindi. Budan bólek, áleýmettik sala boıynsha tórt jobaǵa 279,5 mln teńge qarjy qarastyrylǵan.
Osy joba boıynsha Aqsý-Aıýly aýylyndaǵy kóp jyldardan beri kútim bolmaǵan ortalyq aýrýhanany kúrdeli jóndeýden ótkizýge jalpy sommasy 525,0 mln teńge qarjy bólinip, onyń tenderin memlekettik satyp alý konkýrsy boıynsha 473,0 mln teńgege «Aspap» óndiristik kooperatıvi jeńip aldy. Únemdelgen qarjynyń ózi 52,0 mln teńgeni qurady. Búginde joǵarydaǵy qarjynyń bıylǵa dep josparlanǵan 200,0 mln teńgesi qolǵa tıip, sáýir aıynan bastap kestege sáıkes jumystar júrgizilýde. Aıta ketetin bir jaıt, qurylys jumystaryna jergilikti jerdiń azamattary da molynan tartylǵan.
– Shet aýdandyq ortalyq aýrýhanasyna kúrdeli jóndeý jumystaryn júrgizýdi bıylǵy sáýir aıynan bastadyq. Jumysqa 94 adam men 5 tehnıka kúshi jumyldyryldy. Olardyń arasynda jergilikti turǵyndar da bar. Búgingi kúni jumys qarqyndy júrgizilýde, – deıdi «Aspap» fırmasynyń ýchaske bastyǵy Tóleýhan Akeev.
Jalpy, atalǵan fırmanyń jumysty ýaqytynda jáne sapaly etip bitirerine degen senim mol. Sebebi, «Aspap» О́K elimizdegi qupylys naryǵynda 30 jyldan beri jumys istep kele jatqan bedeldi jáne senimdi kompanııalardyń biri.
Sondaı-aq aýdan ortalyǵyndaǵy Y.Altynsarın, J.Aqylbaev atyndaǵy mektepterdiń jáne Aqsý-Aıýly aýylyndaǵy balalar men jasóspirimder mektep ǵımarattarynyń qasbetterin kúrdeli jóndeýden ótkiziledi. Bul jumystarǵa qajetti qarjy jetkilikti mólsherde bólingen.
Aýdannan jyraqta jatqan aýyldardyń qat-qabat máseleleri de nazardan tys qalmaǵan. Mysaly, bıyl Bosaǵa, Kıikti aýyldarynda sý jelileri aǵymdaǵy jóndeýden ótkiziledi. Sondaı-aq, qazaqtyń klassık kompozıtory Sydyq Muhamedjanovtyń týǵan aýyly Kıiktide orta mekteptiń qurylysy bastalmaqshy. Aýdandaǵy Batyq, Kóktińkóli, Burma aýyldaryndaǵy úılerdiń shatyry, Aqjal eldi mekenindegi balalardyń oıyn alańy jóndeýden ótkiziledi. Al Ortaý, Aqshataý, Dárııa, Tómengi Qaıraqty eldi mekenderindegi joldardy qalypqa keltirý josparda bar.
Shet aýdanynyń ákimi Muhıt Muhtarov bul jumystarmen qatar eldi mekenderdegi sanıtarlyq tazalyq pen abattandyrý jáne jaryqtandyrý jumystaryna da basa nazar aýdarylatynyn aıtady. «Bıylǵy jyly «Eńbek» nátıjeli jumyspen qamtý jáne jappaı kásipkerlikti damytý» baǵdarlamasynyń «Jol kartasy-2020» baǵyty aıasynda aýdandaǵy barlyq aýyldyq eldi mekenderde turǵyndar ıgiligine baǵyttalǵan birqatar aýqymdy jumystar júrgiziledi. Jalpy, osy baǵyttaǵy atqarylatyn sharýalardyń sapaly oryndalýyn jiti nazarda ustaıtyn bolamyz», dep sendirdi aýdan ákimi.