Eńbek jáne halyqty áleýmettik qorǵaý mınıstrliginiń málimetinshe, bıylǵy jyldyń naýryz-sáýir aılarynda jumyssyzdar men tabyssyz qalǵandar sany 4,2 mln adamǵa jetken. Jyldyń aıaǵynda kútiletin jumyssyzdyq deńgeıi 6,1 paıyzdy quraýy múmkin (salystyrmaly túrde alǵanda, 2019 jyldyń sońynda Qazaqstan Respýblıkasyndaǵy jumyssyzdyq deńgeıi 4,8 paıyzdy qurady).
Osyǵan baılanysty QRKF tóraǵasy Satybaldy Dáýletalın «KPI» JShS zaýytynda jýrnalısterge bergen suhbatynda Úkimettiń ekonomıkany qalpyna keltirýde jumyspen qamtýdy qamtamasyz etýdi basymdyqqa alyp qabyldaǵan sharalary eńbek naryǵyndaǵy jaǵdaıdy turaqtandyrýy tıis dep atap ótti, dep habarlady Kásipodaqtar Federasııasynyń baspasóz qyzmeti.
«Bıyl jumyspen qamtý sharalaryna 1,2 mıllıon adamdy tartý josparlanýda. Atap aıtqanda, «Jumyspen qamtýdyń jol kartasy» boıynsha 255 myń jumys orny qurylady. Sonymen qatar, «Jumyspen qamtýdyń jol kartasy» jobalary irgeles salalarda 100000-nan astam turaqty jumys oryndaryn qurýǵa negiz bolady», degen statıstıkany keltirgen Satybaldy Dáýletalınniń aıtýynsha, qazirgi ýaqytta elimizdiń barlyq kásipodaq birlestikteri ortaq máseleni sheshýge ıaǵnı jumys oryndaryn saqtaý jáne tabystaryn ýaqytsha joǵaltqan adamdarǵa jan-jaqty qoldaý kórsetýge kúsh biriktirýde. Kásipodaqtar federasııasy jumys oryndaryn saqtaýdyń dástúrli sharalaryn qoldanýdy usynady. Olar - birneshe jumys pen artyq jumystan bas tartý; tolyq emes jumys aptasyn nemese jumys kúnin engizý; jumysqa ornalasýǵa kómek; merdigerlerden tapsyrystardy óz jumysshylaryna berý jáne biliktilikti arttyrý.
QRKF tóraǵasy buqaralyq aqparat quraldarynyń ókilderimen kásipodaqtardyń jańa jumys oryndaryn saqtaý jáne qurý máselelerindegi ustanymymen de bólisti.
«Memleket áleýmettik-mádenı salada (densaýlyq saqtaý, bilim, mádenıet) buryn ońtaılandyrylǵan kásiporyndar men uıymdardy qalpyna keltirý múmkindigin qarastyrýy kerek. Bul sondaı-aq ekonomıkanyń osy salalaryndaǵy jumys oryndarynyń sanyn kóbeıtýge jáne osylaısha jumyspen qamtýdy qoldaýǵa kómektesýge bolady. Úkimet qabyldaǵan sharalardy odan ári damytý qajet. Jumyssyz qalǵan jaǵdaıda tólenetin ótemaqylardyń ýaqyty men mólsherin arttyrý qajet. Bul sharalar kelesi jyly mindetti túrde saqtalýy kerek dep sanaımyz. Sonymen qatar, korporatıvti bonýstardyń jáne kompanııanyń basshylaryna beriletin qosymsha tólemderdi toqtatý esebinen koronavırýs kesirinen jumysynan aırylǵan adamdardy qaıta daıarlaýdy qarjylandyrý úshin ótemaqy qorlaryn qurý qajet», - dedi Qazaqstan Respýblıkasy Kásipodaqtar federasııasynyń tóraǵasy.
Onyń pikirinshe, jumysynan nemese tabysynan aırylyp, qıyn jaǵdaıǵa tap bolǵan adamdardy tek Úkimet qana emes, sonymen birge áleýmettik áriptestiktiń barlyq taraptary qoldaýy kerek. Dáýletalın kásipodaqtar óz kezeginde daǵdarys aýyrtpalyǵyn jumysshylardyń moınyna artyp, taǵdyr taýqymetimen betpe-bet qaldyrý áreketterine tosqaýyl bolady degendi basa aıtty.