Sońǵy ýaqytta Jambyl oblysynda kóptegen kadrlyq aýys-túıis kóbeıgen. Jyl basynda oblys ákimi qyzmetin atqaryp júrgen Asqar Myrzahmetov ketip, onyń ornyna Premer-Mınıstrdiń orynbasary qyzmetindegi Berdibek Saparbaev kelgen bolatyn. Sodan beri kúni búginge deıin oblys ákiminiń tórt birdeı orynbasary aýystyryldy. Bilim, týrızm sııaqty birqatar basqarmalardyń basshylary jańardy. Qordaı aýdanynyń ákimi aýysty, - dep jazady Egemen.kz
Kúni keshe ǵana Jambyl oblysy ákiminiń orynbasary bolyp kelgen Nurjan Kalenderov Shý aýdanynyń ákimi bolyp taǵaıyndaldy. Al, Shý aýdanyn basqaryp kelgen Jarylqasyn Aıtaqov óz erkimen ornynan ketti. Jańa ákimdi aýdan aktıvine oblys ákiminiń birinshi orynbasary Bekbolat Orynbekov baryp, tanystyrdy. Al, búgin osy ýaqytqa deıin oblys ákimi apparatynyń basshysy bolyp kelgen Almas Mádıev oblys ákiminiń orynbasary laýazymyna kóterildi. Sonymen qatar, Sarysý aýdanynda eki ret ákim bolǵan Qanatbek Mádibek búgin oblys ákimi apparatynyń basshysy oryntaǵyna otyrdy. О́ńirde oryn alyp otyrǵan kadrlyq aýys-túıis áli de jalǵasýy múmkin.
Jambyl oblysy