Qap taýy aımaǵynan ákelingen kólikterge qatysty júrgizýshiler tarapynan koıylatyn suraq az emes. Aqtóbelik Álıhan Ospanqulov basqa da Qazaqstan azamattary syndy armenııalyq nómirli kólikke ıe bolǵandardyń biri. Temir tulpar ıesi endi jyljymaly múligin elimizde tirkegen jaǵdaıda onsyz da qymbat alym túrlerin tóleýge májbúr bolatynyna alańdaýly, - dep jazady Egemen.kz
Sala mamandary alym tóleýdiń tártibin bylaı túsindirdi:
"Zańnamada kózdelgen barlyq alymdar, naqty aıtqanda bul memlekettik baj salyǵy, kádege jaratý alymy jáne kedendik tólemder shetelden ákelingen jáne basqa memleketterdiń esebinde turmaıtyn kólik quraldaryn tirkeý kezinde qarastyrylǵan. Úkimettiń qańtar aıyndaǵy qaýlysy Armenııada avtokólikti esepten alyp, ony Qazaqstanda ádettegi tártippen tirkeýdi qalaıtyn kólik ıeleri úshin qabyldandy. Sondyqtan bul kólik ıelerine atalǵan rásimderdi oryndaý úshin jetkilikti ýaqyt berildi", dedi IIM Ákimshilik polısııa komıteti basshysynyń orynbasary Serik Túsipov.
Qazir sheteldik nómirli kólikterdi arnaıy Halyqqa qyzmet kórsetý ortalyqtarynda tirkeý múmkindikteri qarastyrylǵan. Azamattarǵa qolaıly bolý úshin bul ortalyqtardyń jumysy jeksenbi kúnderi túski saǵat 13:00-ge deıin jalǵasady. Polısııa ókilderi HQKO-nyń muraǵatynda Armenııanyń jaýapty organdarynan berilgen tehnıkalyq qujattar men memlekettik nómirleri saqtalatynyn aıtady.