Túrkistan qalasyn kórkeıtý men abattandyrý jumystary 32 sektor boıynsha júrgizilýde. Ár sektorǵa jaýapty aýdan, qala ákimdikteri men basqarmalar tarapynan bul baǵytta aýqymdy ister atqarylǵan, - dep jazady Egemen.kz
Máselen, Kentaý qalasyna bekitilgen №7-sektor qalada sporttyq qural-jabdyq pen balalar oıyn alańshasyn ornatqan. Qala kóshelerin abattandyrýda aıaqjol tóseý, oryndyqtar men qoqys jáshigin, jaryqtandyrý baǵanalaryn ornatý, jasyl jelekpen kómkerý jumystary júrgizildi. Munymen qosa, ózderine bekitilgen aımaqta asfalt salý jumystary aldaǵy aptada aıaqtalady. Al oblystyq Qoǵamdyq densaýlyq basqarmasyna bekitilgen №29- sektor boıynsha qala kóshelerinde oryndyqtar men qoqys jáshikteri jáne 4 aıaldama ornatyldy. Alty kóshede 200-ge jýyq aǵash egilgen.
Sondaı-aq Túrkistan qalasynda 24 turǵyn úıdiń qurylysy qarqyndy júrgizilýde. Baspanalar jospar boıynsha jyl sońyna deıin tapsyrylady. Kóppáterli turǵyn úıdiń sapasyn tekserip shyqqan oblys ákimi О́mirzaq Shókeev saqtyq sharalaryn kúsheıte otyryp, jumysty toqtatpaýdy tapsyrdy. Qurylysy qyzý nysandardyń biri – 7000 adamǵa laıyqtalǵan stadıon. Sporttyq nysannyń demeýshisi – "Samuryq Qazyna" ulttyq ál-aýqat qory. Munda 2 sportzal, tabıǵı fýtbol alańy, ákimshilik bólmeler bar. Túrkistan qalasynyń ajaryn arttyrǵan "Parasat" saıabaǵy da erekshe keıipke enip keledi. Munda qaıta jańartý jumystary aıasynda jasandy kól men kópirler jáne 420 metr tas aryq kelesi aıdyń sońynda tolyǵymen aıaqtalmaq. Nátıjesinde saıabaq sýmen qamtylyp, ol qaıtadan "Arys-Túrkistan" kanalyna jiberiledi. Al Túrkistan-Kentaý baǵytyndaǵy joldyń eki shetindegi aryqtyń bir bóligi "Parasatty" sýmen qamtysa, ekinshi bóligi jol boıyndaǵy jasyl jelekti sýǵarady. Oblys ákimi tıisti basqarma basshylaryna abattandyrý men kógaldandyrý jumystaryn bekitilgen kestege saı aıaqtaýdy tapsyryp, qurylystyń sapasy qatań baqylaýda ekenin eskertti.
Túrkistan oblysy