Ústimizdegi jyldyń mamyr aıynan beri Petropavldyń Zarechnyı jáne Novopavlovka kentterindegi 17 saıajaı massıvinde atty polısııa tártip qadaǵalaıdy. Bul avtomobıl men jaıaýlar jete almaıtyn joldary qysań ári kedergileri kóp alaptar. Al atty polısııa ondaı jerlerge jyldam jete alady. Saıajaıshylardyń ósirgen ónimderi men múlkine kóz alartýshylar jıi kezdesedi. Tipti buzaqylyq jasap, olardyń dúnıemúlikterin qıratyp ketýshiler de kóp. Salt atty polısııa osyndaılardyń erkinsýine jol bermeıdi.
Patrýldik polısııa batalony kavalerıstik bóliminiń komandıri Jaqsylyq Kójeldaqovtyń aıtýyna qaraǵanda karantın kezinde saltatty polısııa turǵyndarǵa onyń tártibin saqtaýdy da túsindirip júredi. Sonyń ishinde adamdardyń toptalmaýyn, áleýmettik qashyqtyqty saqtaýyn eskertip otyrady. Ásirese, demalys jáne merekelik kúnderde saıajaıǵa keletin adamdar kóbeıip, ishimdik ishilip, tártip kóp buzylatyn kórinedi. Sondaıda baıyrǵy saıajaıshylar saltatty polısııanyń kómegine kóp júginip, tynyshtyq pen tártiptiń saqtalýyn qamtamasyz etýdi ótinedi. Al jýyrda "Ranet" saıajaıshylar qoǵamyndaǵy úılerdiń terezelerin shaǵyp, jurttyń bárin boqtap, laǵattap, qolyndaǵy qarýymen jasqap júrgen bir dáý buzaqyǵa eshkim qarsylyq kórsete almaǵan. Al shaýyp jetken salt atty polısııa buzaqyny birden táýbesine túsirgen. Sosyn qolyna kisen salyp, avtopatrýlge tabys eken.
Atty polısııanyń osyndaı qyzmetterine turǵyndar dán rıza. "Osyndaı kúzetshilerimiz bolǵanyna qýanyshtymyz. Biz olarmen kún saıyn kezdesip, amandasyp júremiz. Isterine rıza ekenimizdi de aıtyp otyramyz. Olar júrgende biz ózimizdi senimdi sezinemiz", deıdi saıajaıshylardyń biri Lıýdmıla Shadrına.
PETROPAVL