Búgin Memleket basshysy Nursultan Nazarbaev duǵa jasaý úshin «Áziret Sultan» meshitine keldi. Prezıdent munda qazaqstandyqtardy Qurban aıt merekesimen quttyqtady. Bul týraly BNews.kz tilshisi habarlady.
«Qurmetti qazaqstandyqtar! Búgin barlyq musylman álemi, dúnıejúzindegi 1,5 mlrd. musylman jurtshylyǵy elimizdiń tól merekesi bolyp sanalatyn - Qurban aıt meıramyn qurmetpen ótkizip jatyr. Táýelsizdik jyldarynda ózimizdiń tól dinimiz - ıslam dinine halqymyz jappaı oralyp jatyr. Osynyń barlyǵy qaıyrymen bolsyn! Táýelsizdiktiń arqasynda Qazaqstandaǵy 3 myńnan astam meshit jumys istep tur, jańalary salynyp jatyr. Myna Astanada eń negizgi, eń úlken meshitimizdi de saldyq. Osynyń barlyǵy musylmandarǵa degen qamqorlyq», - dedi Qazaqstan Prezıdenti.
«О́zimizdiń shyn dinimizben, ımandylyqpen elimizdi birlikke shaqyryp, Qazaqstannyń táýelsizdigi uzaǵynan bolsyn dep, dinimiz máńgi bolsyn dep tilek tilep jatqan halyq bar. Sol tilektiń barlyǵy oryndalsyn. Musylmannyń jasap jatqan kádesi - qurbany Allanyń qulaǵyna shalynyp, barlyq tilekteri oryndalsyn!Táýelsizdigimizdiń arqasynda myńdaǵan qazaqstandyqtar qajylyq jasap, Mekkede ózderiniń namazdaryn oqyp, tilek tilep jatyr. Sol tilekterdiń barlyǵy elimizge qabyl bolsyn!Barshalaryńyzdy shyn júregimmen búgingi Qurban aıt merekesimen quttyqtaımyn! Tilegen tilekterińiz, shalǵan qurbandaryńyz Allanyń qulaǵyna shalynyp, sonyń barlyǵy oryndalsyn. Elimizdiń ıgiligine, Qazaqstannyń bolashaǵyna qyzmet etetin bolsyn. Elimiz aman, jurtymyz tynysh bolsyn. Qazaqtardy, musylmandardy Alla birlikterinen eshqashan ajyratpasyn. Aman-saý bolyńyzdar. Barlyq otbasyna jaqsylyq, bereke-birlik tileımin», - dedi N.Nazarbaev.