Nur-Sultan juqpaly aýrýlar stasıonarynyń basshysy Tatıana Sechoeva elordadaǵy koronavırýs ınfeksııasyna shaldyqqan naýqastardyń jaǵdaıy týraly aıtyp berdi, dep habarlaıdy elorda ákimdiginiń baspasóz qyzmeti.
"Bizdiń kópbeıindi medısınalyq ortalyq ızolıatorynda qaıtys bolǵan naýqastar máselesin aıtatyn bolsaq, 4 aı ishinde stasıonarda 46 naýqas kóz jumdy. Qaıtys bolǵandar sany – 1,6%. Maýsym, shilde aıynda kórsetkish kúrt óskeni baıqalady. Onyń birneshe sebebi bar. Birinshiden, naýqastar 50%-dan 100%-ǵa deıingi kólemde ókpe tinderiniń qabynýymen keledi. Demek, medısınalyq kómek suraıtyndardyń deni keshigip keledi. Degenmen, sońǵy aptada naýqastardyń, onyń ishinde aýyr halde túsetinderdiń sany azaıǵany baıqalady", – dedi T. Sechoeva.
Dárigerdiń aıtýynsha, naýqastar aýrý bastalǵannan 7-10 kún ótkennen keıin ǵana aýrýhanaǵa júginedi. Qaýipti sebeptiń biri – naýqastyń jasy. Kóbine 70-ten asqan azamattar. Al 1950-1960 jyly týǵan naýqastar arasynda kóz jumǵandar sany birshama az.
"Taǵy bir sebep, naýqastardyń jasynan keıin qosalqy aýrýlarynyń bolýy. Semizdikten zardap shegetin, qant dıabeti bar, júrek-qan tamyrlary júıesi aýrýy bar naýqastarda (júrektiń ıshemıkalyq aýrýy, ınfarkt bolýy) kóz jumý yqtımaldyǵy joǵary. Al jastar arasynda bul óte sırek kezdesetin jaǵdaı", – dep atap ótti dáriger.
Juqpaly aýrýlar stasıonary basshysynyń aıtýynsha, naýryz, sáýir aılarynda bolǵan jaǵdaılar men búgingi kezdegi naýqastardyń jaǵdaıy bólek. Aýrýdyń klınıkalyq kartınasy ózgergen. Máselen, buryn ókpe tinderiniń qabynýy ǵana kezdesse, qazir polıaǵzalyq jetispeýshilik kóp kezdesedi.
"Tromboembolııalyq asqynýlardyń úlken paıyzy baıqalady. Massıvti trombtyń paıda bolý mehanızmi iske qosylady. Qazirgi aýa raıynyń qolaısyzdyǵynan, ystyq bolǵandyqtan, júreginde aqaýy bar naýqastarda tromb paıda bolýy ábden múmkin", – dedi T. Sechoeva.
Elordalyq densaýlyq saqtaý basqarmasy ambýlatorııalyq kezeńde medısınalyq kómek kórsetýdi uıymdastyrýdyń arqasynda stasıonarlarǵa pnevmonııamen túsetinderdiń sany azaıǵanyn aıtady.
"Emhanalar kúndelikti sımptomsyz jáne KVI jeńil túri bar naýqastarǵa, pnevmonııamen aýyratyn naýqastarǵa monıtorıng júrgizedi. Beıne baılanys formatynda onlaın-keńester ótkiziledi. Úı jaǵdaıyndaǵy stasıonarlar uıymdastyrylyp, naýqastar tegin dári-dármektermen qamtamasyz etiledi. Ambýlatorııalyq kezeńde medısınalyq kómekti uıymdastyrýdyń arqasynda pnevmonııamen túsip jatqan naýqastardyń sany 20%-ǵa azaıdy (1333-ten 1066-ǵa deıin)", – dedi Nur-Sultan qalalyq densaýlyq saqtaý basqarmasy bastyǵynyń mindetin atqarýshy Álııa Rústemova.
Qalada koronavırýstyń 7887 jaǵdaıy tirkeldi, olardyń jartysynan kóbi – 5155 naýqas emdelip shyqty. Kóz jumǵandar sany – 81.