Búgin qazaqtyń qos ǵaryshkeri Toqtar Áýbákirov pen Aıdyn Aıymbetovtiń týǵan kúni, - dep habarlaıdy Egemen.kz.
Qazaqtan shyqqan tuńǵysh ǵaryshker Toqtar Ońǵarbaıuly Áýbákirov 1946 jyldyń 27 shildesi kúni Qaraǵandy oblysy Qarqaraly aýdanynda dúnıege kelgen. Ushqysh, Keńes Odaǵynyń Batyry (1988), Qazaqstan Respýblıkasynyń Halyq qaharmany (1995), Tehnıka ǵylymynyń doktory (1998), professor (1997), Qorqyt Ata atyndaǵy Qyzylorda memlekettik ýnıversıtetiniń qurmetti professory - Toqtar Áýbákirov Reseı Federasııasyndaǵy Armavır joǵary áskerı ushqyshtar ýchılıshesin (1969), Avıasııa ınstıtýtyn bitirgen (1979).
Ol eńbek jolyn 1962 - 1965 jyldary Temirtaý quıma-mehanıka zaýytynda tokar bolyp bastaǵan. Onyń esimi Qaraǵandy oblysynyń "Qurmet" kitabyna altyn árippen jazylǵan. 1969 - 1975 jyly Keńes Odaǵy Áskerı-áýe kúshteriniń Qıyr shyǵys áskerı okrýginde ushqysh, zveno komandıri, eskadrılıa komandıriniń orynbasary bolyp qyzmet etti.
1975 - 1976 jyly Máskeý ushqyshtar-synaqshylar mektebin, Máskeý avıasııa ınstıtýtyn bitirgen (1979). 1976 - 1992 jyly Máskeýdegi A.Mıkoıan atyndaǵy Tájirıbelik konstrýktorlyq bıýronyń ushqysh-synaqshysy mindetterin atqardy. 1988 jyly Keńes odaǵynda tuńǵysh ret áýede ushaqqa 2 ret janarmaı quıdyrý arqyly soltústik polıýske ushý saparyn erlikpen oryndady.
1989 jyly 1-bolyp, avıatasýshy kreıserdiń alańqaıyna "MıG-29k" reaktıvti ushaǵyn úlken sheberlikpen dál qondyrdy. Sondaı-aq, ol reaktıvti ushaqtyń 50-den asa jańa túrin synaqtan ótkizdi. 1990 jyly ǵaryshkerler quramyna alyndy.
1991 jyly 2 sáýirde Keńes Odaǵy Ǵaryshkerler daıarlaý ortalyǵynda ǵaryshqa ushý daıyndyǵyna kirisip, sol jyly 2 qazanda Baıqońyrdan "Soıýz TM-13" kemesimen ǵaryshqa ushty. Ǵarysh kemesi jer tóńiregindegi "Mır" orbıtalyq keshenimen túıisti. Onda ol ózge ǵaryshkerlermen birge bıotehnologııa, metallýrgııa, medısına salalary jáne Aral aımaǵy boıynsha ǵylymı-zertteý jumystaryn júrgizdi.
Zertteý nátıjesinde, Aral ústindegi tuzdy shań boramasynyń paıda bolý prosesi, sol zııandy aerozoldardyń Qazaqstan men Reseı aımaqtaryna taralýynyń ǵaryshtyq sýretteri alyndy.
Sondaı-aq, Qazaqstan aýmaǵyndaǵy atmosferany jáne jer betin zertteý, juldyzdy aspan astrofızıka baqylaý jumystary da oıdaǵydaı ótti.
Sonymen qatar, búgin qazaqtyń taǵy bir ǵaryshkeri, Aıdyn Aqanuly Aıymbetovtiń týǵan kúni. Ol 1972 jyly 27 shildede Almaty oblysy Taldyqorǵan qalasy О́tenaı aýylynda dúnıege kelgen.
Qazaqstan ǵaryshkeri, Halyq qaharmany. Mektepti altyn medalmen bitirgen Aıdyn Aıymbetov 1993 jyly Armavırdegi joǵarǵy áskerı avıasııalyq ýchılısheni "ushqysh-ıstrebıtel" mamandyǵy boıynsha bitirgen.
Ol 2015 jyly 2 qyrkúıekte 2-bortınjener retinde "Soıýz TMA-18M" kemesinde EP-18 saıahaty aıasynda Baıqońyr ǵarysh stansııasynan Halyqaralyq ǵarysh stansııasyna attandy. Aıdyn Aıymbetov ǵaryshta on kún bolyp, mańyzdy zertteýler júrgizgen bolatyn. Ǵarysh keńistigin ıgerýge sińirgen asa zor eńbegi, ǵaryshqa ushý kezinde kórsetken batyrlyǵy men erligi úshin Qazaqstan Respýblıkasynyń ǵaryshkeri Aıdyn Aqanuly Aıymbetovke 2015 jyldyń 14 qazanynda "Halyq qaharmany" ataǵy, sol jyly "Altyn Juldyz" aıryqsha erekshelik belgisi, "Otan" ordeni berildi.